كوكتەمگى مەرەكەلەر قارساڭىندا الماتى قالاسى الاتاۋ اۋدانى وقۋشىلارىنىڭ يننوۆاسيالىق شىعارماشىلىق ورتالىعىندا بۇگىن ەرەكشە كونسەرت ءوتتى، دەپ حابارلايدى Aqshamnews.kz
ساحنادا وتە كىشكەنتاي بالالار ونەر كورسەتتى. ولار ەرەسەكتەردەي بار ونەرلەرىن سالىپ، جەردەگى ەڭ قىمبات ادام - اناعا ارنالعان اندەر مەن بيلەرىن ورىندادى. ونەر كورسەتكەن بالاقايلار، وزدەرىنىڭ ىنتا-جىگەرلەرىمەن ورىنداعان ءاربىر كورىنىستەرىنە ۇلكەن قوشەمەتكە يە بولدى.
ءۇش ءجۇز ورىنعا ەسەپتەلگەن CIT كونسەرت زالى لىق تولى بولدى. «انا – گۇل، انا – جىر، انا – ءومىر شۋاعى!» – دەپ اتاپ وتكەن جاس تالانتتاردىڭ كونسەرتىنىڭ كورەرمەندەرى نەگىزىنەن ايەلدەر قاۋىمى بولدى.
«ءبىز بالالار شىعارماشىلىعىن دامىتۋعا ينۆەستيسيا سالعاندا، ءبىز بولاشاقتىڭ جاڭا ينتەللەكتۋالدى ۇرپاعىن قۇرۋدىڭ نەگىزىن قالايمىز. مۇنداي ءىس-شارالار بالاباقشا تاربيەلەنۋشىلەرىنىڭ قابىلەتتەرى مەن دارىندارىن بىرلەسىپ اشۋ ماقساتىندا اتا-انالار، ۇستازدار مەن بالالاردىڭ باسىن قوسادى. سابيلەر اناعا دەگەن قۇرمەت پەن سۇيىسپەنشىلىك سەزىمدەرىن كورسەتەدى. وسىلايشا، نەگىزگى ادامي قۇندىلىقتار سىڭىرىلەدى»، - دەدى الماتى قالاسى ءبىلىم باسقارماسى باسشىسى سايران سايفەدەنوۆ مىرزا.
كونسەرتتى الاتاۋ اۋدانىنىڭ ءبىلىم باسقارماسى ۇيىمداستىردى. مەكتەپ جاسىنا دەيىنگى بالالار اتا-انالارىمەن، تاربيەشىلەرىمەن جانە بالاباقشا مەڭگەرۋشىلەرىمەن بىرگە «ءبىر تۇتاس تاربيە» باعدارلاماسى اياسىندا 21 كونسەرتتىك ءنومىر كورسەتتى.
بالالار مونولوگتار وقىپ، ءان شىرقادى. اندەردى كورەرمەندەر بىرگە قوسىلىپ ورىندادى. ءار قويىلىمنان كەيىن كورەرمەندەر تىك تۇرىپ قوشەمەت كورسەتتى. كەشتىڭ ەڭ قىزىق قويىلىمى قىزدار مەن ولاردىڭ اكەلەرىنىڭ ورىنداۋىنداعى بي بولدى. كورەرمەندەر قويىلىم كەزىندە سەزىمگە بەرىلىپ كوز جاستارىن تىيا المادى.
ۇيىمداستىرۋشىلار ۋادە ەتكەندەي، مۇنداي مەرەكەلىك شارالار تۇراقتى تۇردە وتكىزىلىپ تۇرادى.