«انا ءۇيى» انالاردىڭ 1،5 جاسقا دەيىنگى بالالاردان باس تارتۋىنا جول بەرمەيدى
الماتى وڭىرلىك كوممۋنيكاسيالار قىزمەتىنىڭ الاڭىندا «انا ءۇيى» («دوم مامى») قوعامدىق قورى وكىلدەرىنىڭ قاتىسۋىمەن باسپا ءسوز كونفەرەنسياسى ءوتتى. جوبانىڭ ارقاسىندا ەلىمىزدە الەۋمەتتىك جەتىمدىكتىڭ الدىن الادى جانە بالالار ۇيلەرىن ازايتادى.
«انا ءۇيى» قوعامدىق قورىنىڭ اتقارۋشى ديرەكتورى اجارقۇل قىلىشبايەۆا ولاردىڭ ۇيىمى 9 جىلدان بەرى جۇمىس ىستەپ كەلە جاتقانىن حابارلادى.
«ءبىز ءۇش نەگىزگى باعىت بويىنشا جۇمىس جۇرگىزىپ جاتىرمىز: الەۋمەتتىك جەتىمدىكتىڭ الدىن الۋ، بالالاردى وتباسىنا ورنالاستىرۋ جانە بالالار ينتەرنات مەكەمەلەرىن ترانسفورماسيالاۋ. «انا ءۇيىنىڭ» داعدارىس ورتالىقتارى بۇگىندە ەلىمىز بويىنشا 21 وڭىردە اشىلعان. ولارعا كىرە وتىرىپ، ايەلدەر قورعالادى، وسىلايشا انالاردىڭ 1،5 جاسقا دەيىنگى بالالاردان باس تارتۋىنا جول بەرىلمەيدى»، - دەدى ا.قىلىشبايەۆا.
انالار ۇيلەرىنىڭ جۇمىسى كەزىندە 5 934 ايەل دەر كەزىندە قوردان اتاۋلى الەۋمەتتىك كومەك الدى، ولاردىڭ بالالارى بالالار ۇيلەرىنە تۇسپەي، وتباسىلارىندا قالدى.
انالار ءۇيىنىڭ جۇمىسى بالالار ينتەرناتتىق مەكەمەلەرىندەگى بالالار سانىن – 2013 جىلعى 10 مىڭنان 2016 جىلى 7 مىڭعا دەيىن قىسقارتۋعا مۇمكىندىك بەردى. الايدا بۇل قازاقستانداعى جەتىمدىك ماسەلەسىن شەشۋ ءۇشىن جەتكىلىكسىز بولدى.
بۇدان وزگە، 2016 جىلى تاعى ءبىر باعىت – بالا اسىراپ الۋ جونىندەگى اگەنتتىك ىسكە قوسىلدى، ونىڭ ميسسياسى – كاسىپتىك دايارلاۋ، بالا اسىراپ العان وتباسىلارعا باعدار بەرۋ جانە قازاقستاندىق قوعامدا بالا اسىراپ الۋ مادەنيەتىن دامىتۋ.
بۇگىندە اگەنتتىك جۇمىسىنىڭ ناتيجەلەرى - بۇل 14،5 مىڭ كەڭەس بەرىلگەن ازاماتتار جانە وتباسىن تاپقان 1660 بالا.