· الماتىدا اتا-انا قامقورلىعىنسىز قالعان بالالاردى قولداپ، قورعاۋعا باعىتتالعان باستامالار قارقىندى دامىپ كەلەدى.
وڭىرلىك كوممۋنيكاسيالار قىزمەتى الاڭىندا وتكەن بريفينگتە «ۇلتتىق بالا اسىراپ الۋ اگەنتتىگى» جوباسىنىڭ جەتەكشىسى فاريدا راحمەتوۆا كاسىبي قابىلداۋشى وتباسى ينستيتۋتىن ەنگىزۋگە ارنالعان جاڭا زاڭ جوباسىنىڭ ماڭىزدىلىعى تۋرالى ايتتى.
ۇلتتىق بالا اسىراپ الۋ اگەنتتىگى – بۇل ەلىمىزدە بالا اسىراپ الۋ مادەنيەتىن دامىتۋعا جانە كاسىبي قابىلداۋشى وتباسىلاردى قولداۋعا سەگىز جىلدان بەرى ەڭبەك ەتىپ كەلە جاتقان «انا ءۇيى» قورىنىڭ ماڭىزدى بولىگى. قازىرگى ۋاقىتتا ەلىمىزدە 20 كەڭەس بەرۋ كابينەتى جۇمىس ىستەيدى، وندا قور ماماندارى جەتىم بالالاردى وتباسىنا قابىلداعىسى كەلەتىن ازاماتتارعا كومەك كورسەتەدى. تەك الماتىنىڭ وزىندە وسى جوبا ىسكە قوسىلعاننان بەرى 2 285 ادام مامانداردان كەڭەس الىپ، ال 818 ازامات قابىلداۋشى اتا-انالار مەكتەبىندە دايىندىقتان ءوتتى. وسى باعدارلامانىڭ ناتيجەسىندە 105 الماتىلىق وتباسى 158 جەتىم بالانى قاناتىنىڭ استىنا الدى.
«ون ەكى جىل ىشىندە ينتەرناتتىق مەكەمەلەردەگى بالالار سانى 10 مىڭنان 4 مىڭعا دەيىن قىسقاردى. الايدا، كەيىنگى بەس جىلدا بۇل كورسەتكىش وزگەرىسسىز قالىپ وتىر. بۇعان باستى سەبەپ – جەتىم قالعان بالالاردىڭ كوبى جاسوسپىرىمدەر، ەرەكشە قاجەتتىلىكتەرى بار بالالار نەمەسە جالعىز ەمەس، باۋىرلارى بار. مۇنداي بالالاردى بالا اسىراپ الۋعا نيەتتى وتباسىلارعا ورنالاستىرۋ قيىنىراق»، – دەيدى «انا ءۇيى» قورىنىڭ پسيحولوگ قىزمەتىنىڭ جەتەكشىسى لاۋرا اقاتايەۆا.
وسىنداي ماسەلەنى شەشۋ ءۇشىن كاسىبي قابىلداۋشى وتباسى ينستيتۋتىن ەنگىزەتىن زاڭ جوباسى ازىرلەنگەن بولاتىن. قۇجات «نەكە جانە وتباسى تۋرالى» كودەكسكە رەسمي تۇردە ەنگىزىلدى.
· تاقىرىپقا وراي
فاريدا راحمەتوۆا، «ۇلتتىق بالا اسىراپ الۋ اگەنتتىگى» جوباسىنىڭ جەتەكشىسى:
اتا-انالار تەرەڭدەتىلگەن دايارلىقتان وتەدى
2016 جىلدان بەرى جۇمىس ىستەپ كەلە جاتقان «ۇلتتىق اسىراپ الۋ اگەنتتىگى» كاسىبي قابىلداۋشى وتباسىلاردى ەنگىزۋگە ەرەكشە نازار اۋدارىپ كەلەدى. بۇل – جاڭا فورمات. ءداستۇرلى قابىلداۋشى وتباسىلاردان ايىرماشىلىعى، فوستەرلىك اتا-انالار تەرەڭدەتىلگەن دايارلىقتان ءوتىپ، كاسىبي دەڭگەيدە جۇمىس ىستەيدى. ولاردىڭ قىزمەتى جاڭا زاڭنامامەن رەتتەلەدى جانە مەملەكەت تاراپىنان قارجىلاي قولداۋ كورسەتۋ قاراستىرىلعان. سونىمەن قاتار، بۇل جۇيە قورعانشىلىق جانە قامقورشىلىق ورگاندارى تاراپىنان تۇراقتى باقىلاۋدى كوزدەيدى. اتا-انالار ءار جارتى جىل سايىن بالانىڭ دەنساۋلىعى مەن دامۋى تۋرالى ەسەپ بەرۋگە مىندەتتەلەدى، ال ماماندار بۇل وتباسىلارمەن تىعىز جۇمىس ىستەۋدى جالعاستىرادى.