ارال تەڭىزى جايلى ءوز زەرتتەۋىن جۇرگىزىپ جاتقان امەريكالىق عالىم كىتاپ جازۋدى قولعا الدى.
سارا كەمەرون سول ءۇشىن قازاقستان مەن وزبەكستانعا اتتانىپ، ماسەلەنى تەرەڭىرەك قاراستىرماق، دەپ حابارلايدى Almaty-akshamy.kz 24.kz-كە سىلتەمە جاساپ.
بۇعان دەيىن قازاق دالاسىنداعى اشارشىلىقتى زەرتتەگەن ول «اشارشىلىق جايلاعان دالا» اتتى كىتابىن جارىققا شىعارعان بولاتىن. قازاقستاندا بىرنەشە مارتە بولعان پروفەسسور: «ءبىر تەڭىزدىڭ ەكى جاعالاۋىنىڭ جاعدايىن كورۋ تاريحتىڭ ەڭ قىزىقتى اسپەكتىلەرىنىڭ ءبىرى»، دەيدى. وزبەكستان جاعىندا سۋ 1960 جىلدارى تارتىلسا، قازاقستاندا ون جىل كەيىن تارتىلعان. بۇنىڭ سەبەپتەرى ءارتۇرلى. جالپى ارال تاقىرىبىندا كوپتەگەن عىلىمي زەرتتەۋلەر جۇرگىزىلگەن. «مىسالى حيميالىق، فيزيكالىق جاعىنان ەڭبەكتەر بولعانىمەن، تابيعي داعدارىس ايماقتاعى ادامدارعا قالاي اسەر ەتكەنى تۋرالى بىزدە تولىق تۇسىنىك جوق»، - دەيدى عالىم.
سارا كەمەرون، عالىم-ساراپشى:
- مەن تۇرعىنداردىڭ كورگەن قاسىرەتىنە عانا ەمەس، سول جەردە ءومىر سۇرۋگە تىرىسقان اڭگىمەلەرىنە نازار اۋدارعىم كەلەدى. مەنى سول جەردەگى ادامداردىڭ اۋىزبىرشىلىگى تاڭعالدىردى. حالىقتىڭ دەنى تۇرىپ جاتقان قالالارىن جاقسى كورەدى، سوندا قالعىلارى كەلەدى. تۋىپ وسكەن جەرى، اتا-باباسىنىڭ مەكەنى ولار ءۇشىن ماڭىزدى. كىتابىمدا جازعىم كەلەتىن ءبىر ماسەلە وسى. كەيبىرەۋلەر جەرگىلىكتى حالىقتى اپات ايماعىنان كوشىرىپ تاستايىق دەۋى مۇمكىن. ءبىراق بۇل كوزقاراس دۇرىس ەمەس دەپ ويلايمىن. تۇرعىندار نە قالايتىنىن ءبىلۋ كەرەك. جالپى ايماقتاعى ميگراسيا ماسەلەسى ءالى دە زەرتتەۋدى قاجەت ەتەدى. قانشا ادامنىڭ قايدا جانە قاشان كوشكەنى تۋرالى مالىمەتتەردى ارحيۆتەردەن جيناۋعا تىرىستىم. جالپى ارال تاريحى امەريكالىق اۋديتوريا ءۇشىن وتە قىزىقتى جانە ماڭىزدى.