ق ر ەڭبەك سىڭىرگەن قايراتكەرى امانتاي بەرعالييەۆ №178 مەكتەپ اۋماعىندا ورنالاسقان، ءوزى تىركەلگەن سايلاۋ ۋچاسكەسىنە نەمەرەسىمەن بىرگە كەلدى، -دەپ حابارلايدى almaty-akshamy.kz
«ءبىز كىرىپ كەلگەندە، مۇندا مەرەكەلىك اتموسفەرا، مۋزىكا ويناپ تۇردى. جالپى، اۋا-رايى دا قازاقستان ءۇشىن وسىنداي ماڭىزدى كۇندە بىزگە سىيلىق جاساعان سياقتى. كۇن دە بۇگىن شۋاعىن مولىنان توگىپ تۇر. مەن نەمەرەممەن بىرگە كەلدىم. ول ءالى داۋىس بەرە المايدى، 6-سىنىپتا وقيدى. ءبىراق كىشكەنتاي بولسا دا، ەلىنىڭ تاريحىنا جانە قازاقستاندا بولىپ جاتقان ءتۇرلى وقيعالارعا دەگەن قىزىعۋشىلىعى وتە جوعارى. مەن، ارينە، نەمەرەمنىڭ بۇل سەرگەكتىگىن، جاقسىنى بىلمەككە دەگەن قۇشتارلىعىن اركەز قولداۋعا دايىنمىن. ءبىز وسكەلەڭ ۇرپاققا ۇلگى بولۋىمىز كەرەك. نەمەرەم مەنىڭ سايلاۋعا باراتىنىمدى بىلگەندە، مەنىمەن بارعىسى كەلەتىنىن ايتتى. مۇنىڭ ءبارى وعان وتە قىزىقتى. ول دا – بولاشاق سايلاۋشى عوي»، – دەدى قازاقستاننىڭ ەڭبەك سىڭىرگەن قايراتكەرى.
امانتاي بەرعالييەۆ قازىرگى سايلاۋدىڭ ەل ءۇشىن ماڭىزى زور بولاتىنىنا سەنىمدى.
«ءماجىلىس پەن ءماسليحاتتار دەپۋتاتتارىن سايلاۋ – ماڭىزدى كەزەڭ. بۇگىن ءبىز بيۋللەتەنگە بەلگى سوعىپ قانا قويماي، سەنەتىن ادامدارىمىزدى تاڭدايمىز. ويتكەنى ولار ءبىزدىڭ تالاپ-تىلەگىمىزدى بيلىك ورگاندارىندا جەتكىزۋشىلەر. ءاربىر قازاقستاندىق ءۇشىن ماڭىزدى بولىپ تابىلاتىن ماسەلەلەردى شەشۋ جولدارىن ۇسىنۋشىلار دەپ بىلەمىن. ءيا، بۇل – ەلدىڭ بولاشاعى شەشىلەتىن ايتۋلى كۇن. ۇيگە قايتىپ بارا جاتقاندا، تاڭەرتەڭ قالا كوشەلەرىندە كەتىپ بارا جاتقان ادامدارعا نازار اۋداردىم. ءبارى قۋانىشتى بولىپ كورىندى. ولاردىڭ داۋىس بەرۋگە بارا جاتقانىنا دا سەنىمدى بولدىم. ءبىزدىڭ الماتىلىقتاردىڭ سايلاۋدىڭ جالاڭ ناۋقان ەمەس، ەلدىڭ، قوعامنىڭ جۇگىن ارقالايتىن ازاماتتارعا مۇمكىندىك بەرۋ كوزى ەكەنىن ءتۇسىنىپ كەلەدى دەپ ويلايمىن»، – دەيدى امانتاي بەرعالييەۆ.