كونستيتۋسيا – كەز كەلگەن مەملەكەتتىڭ ىرگەتاسى
بۇل تۋرالى ەلىمىزدىڭ جاس ماجىلىسمەندەرى – «AMANAT» فراكسياسىنىڭ مۇشەلەرى ەلنۇر بەيسەنبايەۆ پەن ءمادي احمەتوۆ قازاق باس ساۋلەت-قۇرىلىس اكادەمياسىنىڭ ۇجىمى مەن ستۋدەنتتەرىمەن كەزدەسۋدە ءبولىستى، دەپ حابارلايدى Almaty-akshamy.kz.
«ءقازىر ەلىمىزدىڭ بارلىق وڭىرلەرى مەن ەلدى مەكەندەرىندە مەملەكەتىمىزدىڭ باستى قۇجاتىنا تۇزەتۋلەر ەنگىزۋگە قاتىستى اۋقىمدى ءاقپاراتتىق-تۇسىندىرۋ جۇمىستارى جۇرگىزىلۋدە. الماتى تۇرعىندارىمەن كەزدەسۋلەردىڭ العاشقى تولقىنىن اياقتاي وتىرىپ، ءبىز جاس الماتىلىقتار اراسىندا وتەتىن رەفەرەندۋمعا دەگەن جوعارى قىزىعۋشىلىققا نازار اۋداردىق. سەبەبى كەزدەسۋلەردە كوپتەگەن وتكىر تاقىرىپتار كوتەرىلىپ، ستۋدەنتتەر سۇراقتار قويىپ، ءوز پىكىرلەرىن اشىق ءبىلدىردى. ەل پرەزيدەنتى ۇسىنعان نەگىزگى رەفورمالار ولاردىڭ قوعامدىق-ساياسي بولاشاعىنا دەگەن سەنىمىن نىعايتۋدا»،- دەدى دەپۋتات ءمادي احمەتوۆ.
كونستيتۋسياعا ەنگىزىلگەن 33 تۇزەتۋدىڭ ءارقايسىسىنا قىسقاشا شولۋ جاساي وتىرىپ، پارتيانىڭ رەسپۋبليكالىق شتابىنىڭ مۇشەلەرى ولاردىڭ بىرەۋىنە جەكە توقتالدى. مىسالى، ءماجىلىس پەن وبلىستىق ءماسليحاتتاردىڭ دەپۋتاتتارىن سايلاۋدىڭ ماجوريتارلىق-ۇيلەسىمدى مودەلى ءبىر مانداتتى اۋماقتىق سايلاۋ وكرۋگتەرى بويىنشا بارلىق جاستاعى، بۇل رەتتە وزدەرىن قانداي دا ءبىر پارتيامەن بايلانىستىرمايتىن بەلسەندى ازاماتتارعا جول اشاتىن بولادى.
ءوز كەزەگىندە پارتيا مۇشەلەرى ءاربىر قازاقستاندىقتىڭ الدىندا ماڭىزدى شەشىم قابىلداۋ مىندەتى تۇرعانىن اتاپ ءوتتى.
«كونستيتۋسيا – كەز كەلگەن مەملەكەتتىڭ ىرگەتاسى. پرەزيدەنت قاسىم-جومارت توقايەۆ نەگىزگى مىندەت قويدى – ەلىمىزدى الەمنىڭ ءبىرقاتار دامىعان مەملەكەتتەردىڭ قاتارىنا شىعارۋ. قازىرگى قوعامدا وزگەرىستەر ۇلكەن سۇرانىسقا يە. رەفەرەندۋم وتەتىن كۇنگە دەيىن از عانا ۋاقىت قالدى. ءاربىر ازامات ەل دامۋىنىڭ جاڭا كەزەڭىن قالىپتاستىرۋعا قاتىسىپ، ۇلەسىن قوسۋعا مۇمكىندىك تۋدى»،-دەپ تۇيىندەدى ماجىلىسمەن ەلنۇر بەيسەنبايەۆ.
كەزدەسۋدى قورىتىندىلاي كەلە، قاتىسۋشىلار كونستيتۋسيالىق تۇزەتۋلەر جوباسى بويىنشا ەل تۇرعىندارىنىڭ جالپىعا بىردەي داۋىس بەرۋى – قازاقستاندىقتاردىڭ بىرلىگىنىڭ جانە دەموكراتيالىق قاعيداتتاردى تاباندى ۇستانۋىنىڭ كورنەكى ۇلگىسى بولادى دەگەن ورتاق پىكىرگە كەلدى. 5 ماۋسىمدا وتكىزىلەتىن رەفەرەندۋم سايلاۋ جاسىنا جەتكەن ءاربىر ازاماتقا ەلدىڭ بولاشاعىن ايقىندايتىن تاريحي وقيعاعا تىكەلەي قاتىسۋعا مۇمكىندىك بەرەدى.