ارداگەرلەرگە قۇرمەت كورسەتىلدى
جەڭىس كۇنى قارساڭىندا «AMANAT» پارتياسىنىڭ مۇشەلەرى ەلىمىزدىڭ بارلىق وڭىرلەرىندە سوعىس ارداگەرلەرىن قۇتتىقتادى، دەپ حابارلايدى Almaty-akshamy.kz Inform.kz-كە سىلتەمە جاساپ.
بۇگىن «AMANAT» پارتياسىنىڭ اتقارۋشى حاتشىسى اسحات ورالوۆ ەلوردادا تۇراتىن ارداگەرلەردىڭ ۇيىنە باردى. ولاردىڭ اراسىندا پولشا، رۋمىنيا جانە ۆەنگريانى ازات ەتۋ ءۇشىن بولعان سوعىسقا قاتىسقان 98 جاستاعى رزاعۇل بايكەشيەۆ، بەرلينگە جەتكەن 96 جاستاعى جۇنىسپەك كارىموۆ جانە مايدانعا ءوز ەركىمەن اتتانىپ، جەڭىس كۇنىن بۋداپەشتتە قارسى العان 97 جاستاعى رايسا سافونيچيەۆا بار.
«مەن سوعىسقا 1941 جىلى 7 تامىز كۇنى 17 جاسىمدا اتتاندىم. 101ء-شى بريگادانىڭ قۇرامىندا بولدىم. ءبىزدى 4-5 اي وقىتىپ، بىردەن مايدانعا جىبەردى. جاسىمىزدىڭ كىشىلىگىنە قاراماستان، ءارقايسىمىز وتان ءۇشىن جان بەرۋگە دايىن بولدىق»، – دەدى رزاعۇل بايكەشيەۆ.
اسحات ورالوۆ 9 مامىر مايدانگەرلەر مەن تىل ەڭبەككەرلەرىنىڭ تاريحي ەرلىگى ءۇشىن ماقتانىش پەن شىنايى قۇرمەت كورسەتەتىن مەرەكە بولىپ قالا بەرەتىنىن اتاپ ءوتتى.
«ارداگەرلەرىمىزدىڭ ۇلى ەرلىگىن ءاربىر قازاقستاندىق قۇرمەتتەپ، ەستە ساقتاۋى كەرەك. بىزگە اشىق اسپان، بەيبىت ءومىر سىيلاعان ارداگەرلەرىمىزدىڭ ەسىمدەرىن ەشقاشان ۇمىتپايمىز. قارتتارعا قامقورلىق كورسەتۋ - ءبىزدىڭ ورتاق پارىزىمىز. ولارعا قولداۋ ءبىلدىرۋ ءارقاشان «AMANAT» پارتياسىنىڭ باستى نازارىندا بولادى. مايدانعا 1،2 ملن استام قازاقستاندىق اتتانىپ، ونىڭ جارتىسى ۇيلەرىنە ورالمادى. 9 مامىر - ارداگەرلەرىمىزدىڭ تاريحي ەرلىگى ءۇشىن ماقتانىش جانە شىنايى قۇرمەت كۇنى بولىپ قالا بەرەدى»، - دەپ اتاپ ءوتتى ول.
ايتا كەتەيىك، «ارداگەرلەردى ارداقتايىق» جوباسى اياسىندا اعا ۇرپاققا قامقورلىق كورسەتۋ - پارتيانىڭ باسىم باعىتتارىنىڭ ءبىرى. جوبا اياسىندا مەديسينالىق-الەۋمەتتىك مەكەمەلەردە تۇراتىن قارتتاردىڭ ءومىر ءسۇرۋ جاعدايىنا مونيتورينگ جۇرگىزۋ جالعاسىپ جاتىر. ەلىمىز بويىنشا 45 بەلسەندى ۇزاق ءومىر ءسۇرۋ ورتالىعى اشىلىپ، وندا 60 مىڭنان استام قاريا بوس ۋاقىتىن وتكىزەدى. قارتتاردىڭ الەۋمەتتىك-تۇرمىستىق جاعدايىنا بايلانىستى 300 مىڭنان استام ماسەلە شەشىمىن تاۋىپ، 275 مىڭ ادامعا اتاۋلى كومەك كورسەتىلدى.