العاشقى جۇمىس وتىرىسى تامىز ايىنا جوسپارلاندى
«AMANAT» پارتياسىنىڭ ورتالىق اپپاراتىندا كولىك جانە لوگيستيكا كوميتەتىنىڭ ۇيىمداستىرۋ جونىندەگى وتىرىسى ءوتتى. سونىڭ بارىسىندا كوميتەتتىڭ قۇرامى مەن ەرەجەسى بەكىتىلدى، دەپ حابارلايدى Almaty-akshamy.kz پارتيانىڭ باسپا ءسوز قىزمەتىنە سىلتەمە جاساپ.
كوميتەت ءتوراعاسى بولىپ پارلامەنت ءماجىلىسىنىڭ دەپۋتاتى، «AMANAT» پارتياسى فراكسياسىنىڭ مۇشەسى سامات اقىشيەۆ سايلاندى.
سالا ماماندارىنىڭ پىكىرىن ەسكەرە وتىرىپ، كوميتەت قۇرامىنا تەمىرجول تاسىمالداۋشىلارى قاۋىمداستىعىنىڭ، ۆاگون وپەراتورلارىنىڭ، ۇلتتىق ەكسپەديتورلاردىڭ، جولاۋشىلار كولىگىنىڭ، بيزنەس-قوعامداستىقتىڭ، بەيىندى مينيسترلىكتەردىڭ وكىلدەرى جانە تاعى باسقالار كىردى.
وتىرىس بارىسىندا سالانىڭ ترانزيتتىك ينفراقۇرىلىمىن دامىتۋ، شەتەلدىك تاسىمالداۋشىلاردى كولىك باقىلاۋىنان وتكىزۋدىڭ جەتكىلىكسىزدىگى، 3 مىڭنان استام قوعامدىق كولىك جۇرگىزۋشىسىنىڭ تاپشىلىعى سياقتى ماسەلەلەر كوتەرىلدى.
پارتيا حاتشىسى ەلدار جۇماعازييەۆ اتاپ وتكەندەي، قازاقستاننىڭ ورتالىق ازيا، رەسەي، جۇڭگو جانە ەۋروپا ەلدەرىن ءوزارا بايلانىستىرىپ تۇرعان ءتيىمدى گەوگرافيالىق جاعدايىن ەسكەرە وتىرىپ، ەلىمىز كولىك-لوگيستيكا سالاسىنىڭ الەۋەتىن تولىق پايدالانا الادى.
كوميتەت مۇشەلەرى كولىك ساياساتى ستراتەگياسىن ازىرلەۋ جانە وتاندىق تاسىمالداۋشىلاردىڭ باسەكەگە قابىلەتتىلىگىن ارتتىرۋ، ءترانزيتتىڭ جاڭا باعىتتارىن پىسىقتاۋ، ينفراقۇرىلىمدى دامىتۋ بويىنشا كەشەندى شارالار قابىلداۋ قاجەت ەكەنىن اتاپ ءوتتى.
كوميتەتتىڭ العاشقى جۇمىس وتىرىسى تامىز ايىنىڭ باسىنا جوسپارلانىپ وتىر.