الماتى وبلىسىندا سيرەك كەزدەسەتىن ءسىبىر تاۋ ەشكىسى فوتوتۇزاققا ءتۇسىپ قالدى.
الماتى وبلىسىنداعى «التىنەمەل» ۇلتتىق پاركىندە ءسىبىر تاۋ ەشكىسى فوتوتۇزاققا ءتۇسىپ قالدى، دەپ حابارلايدى Almaty-akshamy.kz قازاقپارات سايتىنا سىلتەمە جاساپ.
ونىڭ ۆيدەوسى «التىنەمەل» تابيعي پاركىنىڭ Instagram-داعى پاراقشاسىندا جاريالاندى. ءسىبىر تاۋ ەشكىسى ەجەلدەن ۇلتتىق پاركتىڭ شولاق، دەگەرەس جانە ماتاي تاۋلارىن مەكەندەيدى. 2021 جىلى ونىڭ سانى 2800 باستان استى.
«فوتوتۇزاققا تەكەسى ءتۇسىپ قالدى. ۆيدەودان ونىڭ سەمسەر ءتارىزدى 1 مەتردەي ءمۇيىزىن كورۋگە بولادى»، - دەلىنگەن الەۋمەتتىك جەلىدەگى پاراقشادا.
بۇعان دەيىن قازاقستاننىڭ قىزىل كىتابىنا ەنگەن تيان-شان قوڭىر ايۋى فوتوتۇزاققا ءتۇسىپ قالعان بولاتىن. سونىمەن قاتار قار بارىسىنىڭ ۇرعاشىسى جانە ونىڭ ءبىر جاسار الانى «كولساي كولدەرى» ۇلتتىق تابيعي پاركىنىڭ بەينەتۇزاعىنا ىلىنگەن ەدى.