قازىرگى ۋاقىتتا جوبانىڭ 70 پروسەنتى اياقتالىپتى.
قۇرىلىسى ءتورت جىلعا سوزىلعان «التىن وردا» ماڭىنداعى جول بيىل سالىنىپ بىتەدى. جاۋاپتىلار ون جولاقتى كۇرە جولدى الداعى ايدا قولدانىسقا بەرمەك. مۇنى يندۋستريا جانە ينفراقۇرىلىمدىق دامۋ ۆيسە-مينسترى بەرىك كامالييەۆ ايتتى. بۇدان بولەك، مەردىگەرلەر الماتى مەن قاسكەلەڭ اراسىندا تاعى بىرنەشە كوپىر مەن اينالمالى جول سالۋدى جوسپارلاپ وتىر، دەپ حابارلايدى Almaty-akshamy.kz 24.kz-كە سىلتەمە جاساپ.
الماتى-بىشكەك حالىقارالىق اۆتوجولىنىڭ 16-19 شاقىرىم ارالاعىن كۇردەلى جوندەۋگە ۇكىمەت قازىناسىنان 11 ملرد تەڭگە قاراجات بولىنگەن ەدى. كوپ جىلدان بەرى «التىن وردا» بازارى ماڭىنان تاڭەرتەڭ جانە كەشكى ۋاقىتتا كولىكپەن ەركىن ءوتۋ مۇمكىن بولماي كەلەدى. قالاعا كىرىپ شىعاتىن دالىزدە كۇن سايىن كولىك كەپتەلىسى بولادى. بۇدان جۇرگىزۋشىلەردىڭ ابدەن ىعىرى شىقتى. قازىرگى ۋاقىتتا جوبانىڭ 70 پروسەنتى اياقتالىپتى. ەندى ەكى كوپىردى ءبىتىرۋ عانا قالدى دەيدى مەردىگەر مەكەمەنىڭ ماماندارى.
«كوپىردىڭ ۇزىندىعى - 600 مەتر. ونىڭ ءبىر جاق باعىتىنداعى جۇمىس اياقتالىپ قالدى. قالعان 80 مەترىنە بەتون قۇيۋ مەن اسفالت توسەۋ جۇمىسى جۋىق ارادا بىتەدى. ەندى الماتىدان وبلىسقا باراتىن باعىتتاعى ەكىنشى كوپىر جاسالىپ جاتىر. مونوليتتىك جۇمىس بىتكەن سوڭ ءقوپىردىڭ جاقتاۋلارى ورناتىلىپ، جارىقتاندىرۋ جاسالادى»، - دەيدى قۇرىلىس جوباسىنىڭ جەتەكشىسى يسمەت ءابىلوۆ.
سونداي-اق قازىرگى ۋاقىتتا «قازاۆتوجول» مەكەمەسى الماتى-ۇزىناعاش باعىتىنداعى 42 شاقىرىمدىق جولعا كۇردەلى جوندەۋ جۇمىستارىن جۇرگىزىپ جاتىر. ال «التىن وردا» بازارىنىڭ الدىنداعى جولمەن كۇن سايىن قالاعا 40 مىڭعا جۋىق اۆتوكولىك كىرەدى. ەندى ءبىر ايدان كەيىن بۇل جول قۇرىلىسى تولىق اياقتالادى دەيدى ءمينيستردىڭ ورىنباسارى.
«وسى قازاننىڭ اياعىنا دەيىن وسى جەردەگى ون جولاق بىتەدى. الماتى قالاسىندا قاراشا ايىندا دا جۇمىس ىستەۋگە بولادى. ساپاسىن قاراپ وتىرامىز. تەكسەرىپ وتىرادى»، -دەدى ق ر يندۋستريا جانە ينفراقۇرىلىمدىق دامۋ ۆيسە-مينيسترى بەرىك كامالييەۆ.
بۇعان دەيىن دە ۇكىمەت باسىنداعىلار ەلدىڭ جۇيكەسىن جۇقارتقان «التىن وردا» جولىن 2020 جىلدىڭ سوڭىندا پايدالانۋعا بەرەمىز دەپ ۋادە ەتكەن ەدى. ءبىراق ول ۋادە ورىندالماعان. بۇل جولى جوسپار ۋاقىتىندا ىسكە اسسا، بىرنەشە شاقىرىمعا سوزىلعان كەپتەلىس سەيىلىپ، ەل دە العىسىن ايتار ەدى. جالپى بيىل ەلىمىزدە 6 مىڭ شاقىرىم جولدى جوندەۋ جۇمىستارى باستالعان. سونىڭ 2200 شاقىرىمى بيىل اياقتالادى.