27 ادام قۇتقارىلدى، ونىڭ 6-ۋى بالالار
الماتى قالالىق پوليسيا دەپارتامەنتىنىڭ حابارلاۋىنشا، برۋسيلوۆسكيي كوشەسىندە ورنالاسقان «التىن بۇلاق-2» تۇرعىن ءۇي كەشەنىنىڭ 18 قاباتتى ۇيىنەن قويۋ ءتۇتىن شىققانى تۋرالى دابىل قاققان حابار تۇنگى ساعات ون ەكىلەر شاماسىندا تۇسكەن.
جبو جەدەل كەزەكشىسى ءورت ورنىنا دەرەۋ پاترۋلدىك پوليسيانىڭ 13 ەكيپاجىن جونەلتتى. سونداي-اق، ءورت ورنىنا ىرگەلەس جاتقان كورشى اۋدانداردان دا ادامدار تارتىلدى. «التىن بۇلاق-2» تۇرعىن ءۇي كەشەنىنىڭ تۇرعىندارىن قۇتقارۋعا جانە ءورتتىڭ سالدارىن جويۋعا بارلىعى 35 پوليسيا قىزمەتكەرى قاتىستى.
ەڭ الدىمەن وسى ءۇيدىڭ 177 تۇرعىنى ەۆاكۋاسيالاندى. 27 ادام قۇتقارىلدى، ونىڭ 6-ۋى بالالار. «جەدەل جاردەم» بريگادالارى جانۋ ونىمدەرىنەن ۋلانعان 2020 جانە 2021 جىلى تۋعان ءۇش ءسابيدى شۇعىل تۇردە 1 قالالىق كلينيكالىق بالالار اۋرۋحاناسىنا جەتكىزدى.
ساعات 01:45-تە ءورت ءسوندىرىلدى. ونىڭ سەبەبىن ساراپتاما انىقتايدى.