دارىگەرلەر جاڭا اپپاراتتى سىناپ كوردى
بۇگىن ورتالىق قالالىق كلينيكالىق اۋرۋحانادا قۋىق استى بەزىنىڭ قاتەرسىز گيپەرپلازياسىن ەمدەۋ جانە جۇمساق تىندەرىنە حيرۋرگيا جۇرگىزۋگە ارنالعان جاڭا لازەرلىك تۋليي اپپاراتتى يگەرىپ-مەڭگەرۋ بويىنشا ماستەر-كلاسس ءوتتى، دەپ حابارلايدى Almaty-akshamy.kz
وقكا باسپا ءسوز قىزمەتىنىڭ حابارلاۋىنشا، الماتى قالاسىنىڭ ۋرولوگتارى ءۇشىن ماستەر-كلاستى ماسكەۋ وبلىسىنىڭ كولومەنسكيي واا ۋرولوگيا بولىمشەسىنىڭ مەڭگەرۋشىسى دميتريي بارانسيەۆ جۇرگىزدى.
ماماننىڭ ايتۋى بويىنشا، وسى لازەرلىك تۋليي قۇرالى نارىقتا ەڭ ۇلكەن ءوندىرىلۋ قۋاتتىلىعىمەن، ياعني، 200 ۆت جانە اشىق تۇردە، جۇمساق تىندەردىڭ رەزەكسياسى، ابلياسياسى، ۆاپوريزاسياسى (3مين/گ جىلدامدىقپەن)، كواگۋلياسياسى، ەكسيزياسى جانە گەموستازدارىنا ەندوسكوپيالىق جانە لاپاروسكوپيالىق حيرۋرگيا جۇرگىزۋ ءۇشىن قولدانىلادى. ماستەر-كلاسس بارىسىندا «قۋىق استى بەزىنىڭ قاتەرسىز گيپەرپلازياسى»، باسقاشا ايتقاندا، قۋىق استى بەزى ادەنوماسى دياگنوزى بار ەكى ناۋقاسقا شاعىن ءينۆازيۆتى وپەراسيا جاسالدى.
«ءبىز بۇرىن وپەراسيانى لازەرلىك اپپاراتتىڭ كومەگىمەن جاسايتىنبىز. تۋليي لازەرىن قولدانۋ بىزگە جاڭا ساپالى دەڭگەيگە جەتۋ جانە ناۋقاستاردىڭ وڭالتۋ مەرزىمىن قىسقارتۋ مۇمكىندىگىن بەرمەك. بۇل دەگەنىمىز - ءبىز ناۋقاستاردىڭ ەسەلەنگەن سان مولشەرىنە كومەكتەسە الامىز دەگەن ءسوز. سونىمەن قاتار، وسى تەحنولوگيانى قولدانۋ ارقىلى ءبىز انتيكواگۋليانتتى تۇتىناتىن ناۋقاستارىمىزعا وپەراسيا جاساي الامىز. بۇگىنگى كۇنى ءبىز قۋىق استى بەزىنىڭ ادەنوماسىمەن اۋراتىن ەكى ناۋقاسقا وپەراسيا جۇرگىزدىك. وپەراسيا ءساتتى ءوتتى. مۇندا، سونداي-اق، وسى اپپاراتتىڭ كومەگىمەن نەسەپ جولىنا ستريكتۋرا، قۋىقتىڭ موينىن (BNI) كەسۋ، قۋىق ىسىگىنە، نەسەپ جولى مەن نەسەپاعار جولىنا ابلياسيا جانە رەزەكسيا جاساۋ، ءۇرپىنى ءتىلۋ نەمەسە ۋرەتروتوميۋ، BHP، قۋىق استى بەزىن ترانسۋرەترالدى تۇردە كەسۋ (TUIP)، قۋىق استى بەزىنە لازەرلى ەنۋكلەاسيا جاسۋ، قۋىق استى بەزىنە لازەرلى ابلياسيا جاساۋ، نەفرەكتوميۋ جۇرگىزە الاتىنىمىزدى دا ايتا كەتكەن ءجون»، - دەيدى ورتالىق قالالىق كلينيكالىق اۋرۋحانانىڭ ۋرولوگيا بولىمشەسىنىڭ مەڭگەرۋشىسى ساكەن بيمەنوۆ.
تۋليي لازەرىنىڭ ءبىرتالاي ارتىقشىلىعى بار. ەنەرگيانىڭ اسا تىعىز شوعىنىڭ ارقاسىندا تىندەردىڭ كەسىپ الىپ تاستاۋ جەڭىل ءوتىپ، گەموستازعا اسەرىن تيگىزىپ، قانسىراۋدى توقتاتا وتىرىپ، سوڭىنان ءتىننىڭ تەز جازىلۋىنا اسەر ەتەدى. ورتالىق قالالىق كلينيكالىق اۋرۋحانادا كۇندەلىكتى وسىنداي وپەراسيانىڭ جەتەۋى جۇرگىزىلەدى، ال، جىل سايىن ونىڭ سانى 700-گە جەتپەك. بۇل جابدىقتى تەك ۋرولوگيا سالاسىندا عانا ەمەس، سونداي-اق، توراۋالدى حيرۋرگيا، جالپى حيرۋرگيا، لور جانە گينەكولوگيا سالاسىندا دا قولدانۋعا بولادى.