الماتىنىڭ تۇركسىب اۋدانىندا شاعىن بيزنەستى مەملەكەتتىك قولداۋ شارالارى ءساتتى جۇزەگە اسىرىلىپ كەلەدى، - دەپ حابارلايدى Aqshamnews.kz.
سونىڭ ىشىندە نەگىزگى قۇرالداردىڭ ءبىرى كاسىپتى ەندى باستاعان كاسىپكەرلەرگە ارنالعان 400 اەك كولەمىندەگى قايتارىمسىز گرانت. بۇل گرانت قاجەتتى جابدىقتاردى ساتىپ الۋعا، جۇمىس ورىندارىن اشۋعا جانە جاڭا قىزمەت تۇرلەرىن ىسكە قوسۋعا مۇمكىندىك بەرەدى. وسىلايشا، تۇرعىنداردىڭ كاسىپكەرلىك بەلسەندىلىگى مەن تابىسى ارتادى.
2025 جىلى تۇركسىب اۋدانىنداعى وتباسىنى قولداۋ ورتالىعى بازاسىندا ءتۇرلى ءبىلىم بەرۋ كۋرستارىن 218 ادام اياقتاپ، قاجەتتى ءبىلىم مەن كاسىپكەرلىك داعدىنى مەڭگەردى. 20 قاتىسۋشى 400 اەك (1 572 800 تەڭگە) كولەمىندە مەملەكەتتىك گرانت يەگەرى اتانىپ، كاسىبىن باستاۋعا مۇمكىندىك الدى. بۇل قولداۋ شارالارىنىڭ تيىمدىلىگىن كورسەتەتىن ماڭىزدى كورسەتكىش جانە اۋداننىڭ شاعىن بيزنەسىن دامىتۋعا قوسقان قوماقتى ۇلەس.
گرانت يەگەرلەرى جوبالارىن ءتۇرلى باعىتتا جۇزەگە اسىرىپ كەلەدى. اتاپ ايتقاندا: تىگىن ءىسى، سپورت، ءبىلىم بەرۋ قىزمەتتەرى، كلينينگ، سۇلۋلىق سالوندارى، پايدالى تاعام ءوندىرىسى، ناۋبايحانا جانە كونديتەرلىك ىستەر بار. اسىرەسە، تىگىن ءوندىرىسى سالاسى ەرەكشە كوزگە ءتۇسىپ وتىر: بيىل بۇل باعىتتا 5 كاسىپكەر گرانت جەڭىپ الدى. ولار شەبەرحانالارىن قاجەتتى قۇرال-جابدىقتارمەن قامتاماسىز ەتىپ، ۇلتتىق بۇيىمدار، مەكتەپ فورماسى جانە كۇندەلىكتى كيىم سياقتى سۇرانىسقا يە ونىمدەر شىعارۋدى باستاپ كەتتى. بۇل جوبالار نارىقتى ساپالى تاۋارلارمەن قامتاماسىز ەتىپ قانا قويماي، جۇمىس ورىندارىن اشۋعا جانە وتباسىلاردىڭ تابىسىن ارتتىرۋعا سەپتىگىن تيگىزىپ وتىر.
