جۇمىس ساپارى اياسىندا الماتى اكىمى دارحان ساتىبالدى تۇركسىب اۋدانىنداعى ءبىرقاتار نىساندى ارالاپ، ينجەنەرلىك جەلىلەر قۇرىلىسىنىڭ بارىسىمەن، الەۋمەتتىك ينفراقۇرىلىمنىڭ دامۋى جانە اۋماقتى كەشەندى كورىكتەندىرۋ جوباسىنىڭ جۇزەگە اسۋىمەن تانىستى، - دەپ حابارلايدى Aqshamnews.kz.
قالا اكىمى اقان سەرى — شولوحوۆ — سەيفۋللين كوشەلەرى اۋماعىنداعى سۋ قۇبىرى مەن كارىز جەلىلەرىنىڭ قۇرىلىس قارقىنىن تەكسەردى. جوبا اياسىندا 18،8 شاقىرىم سۋ قۇبىرى جانە 27،9 شاقىرىم كارىز جەلىسى تارتىلىپ، 4 مىڭنان استام تۇرعىن قامتىلادى. قازىرگى تاڭدا نىسان 60% دايىن. جۇمىس بيىل قىركۇيەكتە تولىق اياقتالماق.
دارحان ساتىبالدى اۋدان اكىمى مەن مەردىگەر ۇيىمعا ورىندالىپ جاتقان جۇمىستاردىڭ ساپاسىن قاتاڭ باقىلاۋدا ۇستاۋدى، قۇرىلىس كەزەڭىندە تۇرعىندارعا قولايلى جاعداي جاساۋدى، سونداي-اق جوبا مەرزىمىندە اياقتالىپ، اسفالت جابىنىن قالپىنا كەلتىرۋ جۇمىستارىن دەر كەزىندە جۇرگىزۋدى تاپسىردى.
ودان كەيىن قالا باسشىسى جاس قانات شاعىناۋدانىنداعى دامۋ جانە شىعارماشىلىق ورتالىعىنىڭ قۇرىلىس الاڭىنا باردى. اۋماعى 14 مىڭ شارشى مەترلىك 1 350 بالاعا ارنالعان عيماراتتا باسسەين، زەرتحانالىق بولمەلەر، پلانەتاريي جانە روبوتوتەحنيكادان بەينەلەۋ ونەرىنە دەيىنگى باعىتتار بويىنشا 42 وقۋ كابينەتى بولادى. نىسان ءبىلىم الۋعا، شىعارماشىلىققا جانە بوس ۋاقىتتى ءتيىمدى وتكىزۋگە ارنالعان اشىق ءارى كوپفۋنكسيونالدى كەڭىستىك قۇرۋعا باعىتتالعان. قۇرىلىس جۇمىستارىن 2027 جىلدىڭ سوڭىنا دەيىن اياقتاۋ جوسپارلانىپ وتىر.
الماتى اكىمى شاعىناۋداندى كورىكتەندىرۋ جايىنا دا ەرەكشە نازار اۋداردى. ول قوعامدىق كەڭىستىكتەردى رەتتەۋمەن قاتار ماگيسترالدىق كوشەلەر بويىنداعى عيماراتتاردىڭ قاسبەتىن جاڭارتۋ، جارىق باعانالارىن رەتكە كەلتىرۋ جانە كوگالداندىرۋ جۇمىستارىن كۇشەيتۋ قاجەتتىگىن اتاپ ءوتتى.