اقپان ايىنان باستاپ الماتى مۋزەيى جاڭا جۇمىس كەستەسىنە كوشتى. ەندى مۋزەي سەيسەنبىدەن جەكسەنبىگە دەيىن ساعات 10:00-دەن 00:00-گە دەيىن كەلۋشىلەرگە قىزمەت كورسەتەدى، - دەپ حابارلايدى Aqshamnews.kz.
بۇل قالا تۇرعىندارى مەن قوناقتارىنا مۋزەيگە تەك كۇندىز ەمەس، كەشكى ۋاقىتتا دا بارۋعا مۇمكىندىك بەرەدى. دۇيسەنبى – سانيتارلىق كۇن.
الماتى مۋزەيى – جەتىسۋ ءوڭىرىنىڭ تاريحي-مادەني مۇراسىن ساقتاۋ، جيناقتاۋ جانە ناسيحاتتاۋمەن اينالىساتىن مادەني ورتالىق. مۋزەي ەكسپوزيسياسى ەجەلگى داۋىردەن قازىرگى زامانعا دەيىنگى الماتى قالاسىنىڭ تاريحىن بەينەلەيتىن 11 زالدان تۇرادى.
مۋزەي قورىندا كونە ەكسپوناتتار، سونىڭ ىشىندە بەينەلەۋ ونەرىنىڭ تۋىندىلارى، قازاق ەتنوگرافياسىنىڭ ۇزدىك توپتاماسى، ءتۇرلى ءداۋىر مەن مادەنيەتتىڭ ايعاعى سانالاتىن ارحەولوگيالىق زاتتار، جازباشا دەرەكتەر جيىنتىعى ساقتالعان.
جۇمىس ۋاقىتىنىڭ ۇزارتىلۋى مۋزەيگە كەلۋشىلەر اياسىن كەڭەيتۋگە، سونىڭ ىشىندە جۇمىس نەمەسە وقۋ اياقتالعاننان كەيىن كەشكى ۋاقىتتا مادەني ورىندارعا بارۋ مۇمكىندىگىن ارتتىرۋعا باعىتتالعان.
الماتى مۋزەيى وسىعان دەيىن سەيسەنبى-جەكسەنبى ارالىعىندا ساعات 10:00-19:00 ارالىعىندا جۇمىس ىستەگەن بولاتىن.
الماتى مۋزەيى قابانباي باتىر، 132 مەكەنجايىندا ورنالاسقان.