مەگاپوليس اكىمى باقىتجان ساعىنتايەۆ قالا تۇرعىندارىنىڭ سۇراقتارىنا جاۋاپ بەرە وتىرىپ، جىلدار بويىنا اسفالت بولماعان شاعىناۋدانداردا جولداردى سالۋ مەن جوندەۋدىڭ اۋقىمى تۋرالى ايتىپ بەردى، دەپ حابارلايدى almaty-akshamy.kz
«الماتى» تەلەارناسىنداعى Akimat LIVE باعدارلاماسىنىڭ تىكەلەي ەفيرى كەزىندە "قۇرامىس" شاعىناۋداننىڭ تۇرعىنى ول تۇراتىن كوشەدەگى جولدىڭ قاشان جاسالاتىنىن سۇرادى. ب.ساعىنتايەۆ اتالعان شاعىناۋداندا بۇگىنگى تاڭدا 27 كوشەنىڭ 23ء-ى اسفالتتالعانىن حابارلادى. ۇزىندىعى 4،9 شاقىرىم بولاتىن بارلىق كوشەلەردى اسفالتتاۋدى الداعى ايدا اياقتاۋ جوسپارلانىپ وتىر.
بيىل الماتىدا 9 شاعىناۋدانداعى 341 كوشەدە 93 شاقىرىم جول سالىنىپ، كۇردەلى جوندەۋدەن وتەدى. قازىرگى ۋاقىتتا 6 شاعىناۋداندا جول جوندەۋ جۇمىستارى اياقتالعان، ولار – "شاڭىراق-5"، "نۇرشاشقان"، "سامعاۋ"، "المەرەك"، "قايرات"، "وجەت". "العاباس" شاعىناۋدانىندا جوسپار بويىنشا 6 شاقىرىم جولدىڭ ورنىنا 6،8 شاقىرىم جول اسفالتتالدى. ەكى شاعىناۋداندا – "قۇرامىس" جانە "دۋماندا" جوندەۋ جۇمىستارىن قاراشا ايىندا اياقتاۋ جوسپارلانۋدا.
بۇدان وزگە، بيىل ۇزىندىعى 201،1 شاقىرىم بولاتىن 206 كوشەگە ورتاشا جوندەۋ جۇمىستارى جۇرگىزىلۋدە. وتكەن جىلى ۇزىندىعى 219،1 شاقىرىم بولاتىن 324 كوشە قامتىلدى، قازىرگى كەزدە ۇزىندىعى 185،5 شاقىرىم بولاتىن 197 كوشەدە جۇمىستار اياقتالدى، قالعان 9 كوشە بويىنشا جۇمىستاردى قازان ايىنىڭ سوڭىنا دەيىن اياقتاۋ جوسپارلانۋدا.
سونىمەن قاتار، جالپى اۋدانى 214 مىڭ شارشى مەتر جولداردا شۇڭقىرلاردى جوندەۋ جۇرگىزىلدى، 1 247 ليۋك تەگىستەلدى. جۇمىستارعا 4 مەردىگەرلىك ۇيىم، 12 بريگادا، 96 جۇمىسشى، 28 ارنايى تەحنيكا جۇمىلدىرىلدى. 31 شاقىرىم تروتۋار، 65 ايالداما الاڭى جوندەلدى.