الماتى قالاسىنىڭ كوممۋنالدىق قىزمەتتەرى قار جاۋادى دەپ بولجانۋىنا بايلانىستى دايىندىقتى باستادى
«قازگيدرومەت» رمك بولجامىنا سايكەس، الماتى قالاسىندا بۇگىن اۋا تەمپەراتۋراسى -6… -8°C-عا دەيىن تومەندەيدى، شامامەن ساعات 04.00-دەن تۇسكە دەيىن قالىڭدىعى 4 سم-گە دەيىن ازداعان قار جاۋادى. جولدار مەن تروتۋارلارعا مۇز قاتىپ، كوكتايعاق بولۋى مۇمكىن.
20 قاڭتاردا كۇندىز كوشپەلى بۇلت شىعىپ، سولتۇستىك-شىعىستان جىلدامدىعى 2-7 م/س جەل سوعادى، اۋا تەمپەراتۋراسى -3...-5°C بولادى.
الماتى قالاسىنىڭ كوممۋنالدىق قىزمەتى كۇشەيتىلگەن جۇمىس رەجيمىنە اۋىستىرىلدى. اۋدان اكىمدىكتەرىندە جۇمىستى باقىلاۋ ءۇشىن تاۋلىك بويى كەزەكشىلىك ۇيىمداستىرىلدى.
20 قاڭتاردا كۇندىز 412 ارنايى تەحنيكا مەن 1120 جۇمىسشى جۇمىلدىرىلادى. تۇندە 436 ارنايى تەحنيكا جانە 219 جۇمىسشى تارتۋ جوسپارلاندى.
قاردى شىعارۋعا 123 بىرلىك، ونىڭ ىشىندە 27 قار تيەۋشى، 75 ءوزى تۇسىرگىش جۇك كولىگى، 11 تراكتور، 10 اۆتوگرەيدەر جانە 156 جۇمىسشى جۇمىلدىرىلادى. ديسلوكاسيا ورىندارىندا قار جاۋعانعا دەيىن 146 قۇم تاراتقىش كەزەكشىلىككە شىعادى.
ءقازىر تروتۋارلاردى، جول شەتىندەگى جيەكتاستاردان قاردى تازالاۋ جۇمىستارى جالعاسىپ جاتىر. 2024 جىلعى 19 قاڭتار ساعات 18:00 جاعداي بويىنشا 19 750 م3 قار شىعارىلدى، بۇل ءوزى تۇسىرگىش جۇك كولىگىنىڭ 1 975 رەيسى دەگەن ءسوز.
ەستەرىڭىزگە سالا كەتەيىك، جولدا، تروتۋارلاردا جانە قوعامدىق ورىنداردا قاردىڭ دۇرىس تازالانباعانىن كورسەڭىزدەر ، +7 (706) 689 8898 Whats App نومىرىنە جۇگىنسەڭىز بولادى.