«الماتىنىڭ جىل ءمۇعالىمى» بايقاۋىنىڭ گران-پري يەگەرىنە پاتەر كىلتى تاپسىرىلدى

الماتى اكىمى باقىتجان ساعىنتايەۆ قالا پەداگوگتارى اراسىنداعى بايقاۋ جەڭىمپازدارىمەن جانە مۇعالىمدەردى قولداۋ مەن كاسىبي دامىتۋعا باعىتتالعان ارنايى گرانت يەگەرلەرىمەن كەزدەستى

قالالىق «الماتىنىڭ جىل ءمۇعالىمى» بايقاۋىنىڭ گران-پري يەگەرى، №39 مامانداندىرىلعان ليسەيدىڭ قازاق ءتىلى مەن ادەبيەتى ءپانىنىڭ وقىتۋشىسى نۇرجىگىت امانوۆ Alma City جاڭا تۇرعىن ءۇي كەشەنىنەن پاتەردى سىيلىققا الدى، دەپ حابارلايدى Almaty-akshamy.kz

ال 1-ورىندى يەلەنگەن №10 گيمنازيانىڭ فيزيكا ءپانىنىڭ ءمۇعالىمى دارىن سايىنوۆقا اۆتوموبيل بەرىلدى.

ەكىنشى جانە ءۇشىنشى ورىن العان №96 مەكتەپتىڭ باستاۋىش سىنىپ ءمۇعالىمى رايسا سوي جانە №92 مامانداندىرىلعان ليسەيدىڭ حيميا ءپانىنىڭ ءمۇعالىمى سۋنناتۋللا كاۋمبايەۆ اقشالاي سىياقىمەن ماراپاتتالدى.

سونىمەن قاتار، 10 ۇزدىك پەداگوگ، ونىڭ ىشىندە بالاباقشا تاربيەشىلەرى قالا اكىمىنىڭ گرانتتارىمەن اتاپ ءوتىلدى. رەسپۋبليكالىق «ۇزدىك پەداگوگ» بايقاۋى قالالىق تۋرىنىڭ جەڭىمپازدارىنا اقشالاي سىيلىقتار بەرىلدى.

«ءوز ماماندىعى بويىنشا ۇزدىكتەردى انىقتاۋعا باعىتتالعان شارا دارىندى مۇعالىمدەردى قولداپ، بەدەلىن ارتتىرىپ، وزىق پەداگوگيكالىق تاجىريبەنى ءبولىسۋ ماقساتىندا وتكىزىلەدى»، -  دەپ اتاپ ءوتتى ب. ساعىنتايەۆ.

مەكتەپكە جاڭا كەلگەن جاس مۇعالىمدەر ءۇشىن وسىمەن ءۇشىنشى جىل قاتارىنان ءبىر رەتتىك ماتەريالدىق كومەك كورسەتىلۋدە. اعىمداعى جىلى ونى 33 ملن تەڭگەدەن استام سوماعا 566 جاس مامان الادى.

مۇعالىمدەردىڭ تۇرعىن ءۇي جاعدايىن جاقسارتۋعا ەرەكشە كوڭىل بولىنەدى. «الماتى جاستارى 3.0» قالالىق باعدارلاماسى بويىنشا وتكەن جىلى ءبىلىم بەرۋ سالاسىنىڭ 307 قىزمەتكەرى پاتەر الدى. بيىل 245 پەداگوگ جەڭىلدەتىلگەن نەسيە بەرۋدى پايدالاندى.

كەزدەسۋ سوڭىندا الماتى اكىمى ب. ساعىنتايەۆ بارلىق پەداگوگتار مەن تالىمگەرلەرگە يگى ەڭبەكتەرىنە تابىس تىلەدى.