الماتىدا تۇرعىن ءۇي قورىنىڭ جاڭارتىلۋى «تۇرعىن ءۇيدى رەنوۆاسيالاۋ باعدارلاماسى» اياسىندا جالعاسۋدا.
جەتىسۋ اۋدانىندا 2030 جىلعا دەيىن 135 ءۇيدى قامتيتىن جاڭا رەنوۆاسيالاۋ باعدارلاماسى بەكىتىلدى، دەپ حابارلايدى aqshamnews.kz
ءقازىر اۋداندا 304 پاتەردى قامتيتىن 34 ەسكى ءۇي بۇزىلدى. كەلەسى جىلى 30 ءۇيدىڭ 280 پاتەرىنىڭ يەسىن جاڭا باسپاناعا كوشىرۋ جوسپارلانىپ وتىر.
مىسالى، قرىلوۆ، سكريابين، گونچاروۆ كوشەلەرى مەن رايىمبەك داڭعىلىنىڭ اۋماعىندا ينۆەستور 16 ەسكى ءۇيدىڭ ورنىنا 944 پاتەردەن تۇراتىن 11 ءۇيدىڭ قۇرىلىسىن جۇرگىزۋدە.
بۇزىلعان ۇيلەردىڭ تۇرعىندارى جاڭا ۇيلەرگە كوشىرىلدى. بۇگىنگى تاڭدا 9 ءۇي تولىق اياقتالعان، ال قالعان 2 ءۇي جىل سوڭىنا دەيىن پايدالانۋعا بەرىلەدى.
سونىمەن قاتار، بوتكين، كازاكوۆ، گونچاروۆ، سكريابين كوشەلەرى مەن رايىمبەك داڭعىلىنىڭ اۋماعىندا تاعى ءبىر كومپانيا 6 ەسكى ءۇيدىڭ ورنىنا 576 پاتەردەن تۇراتىن 11 ءۇي سالىپ جاتىر.
بۇگىندە ءبىرىنشى كەزەكتەگى 3 ءۇي پايدالانۋعا بەرىلىپ، بۇزىلعان ۇيلەردىڭ تۇرعىندارى سول جەرگە كوشىرىلدى. قالعان 8 ءۇيدىڭ قۇرىلىسى جالعاسۋدا.
باعدارلاما اياسىندا جاڭا ۇيگە كوشكەن تۇرعىنداردىڭ ءبىرىنىڭ ايتۋىنشا، ولاردىڭ وتباسى ەسكى، سەيسميكالىق ءقاۋىپتى ءۇيدىڭ ورنىنا زاماناۋي تۇرعىن ءۇي كەشەنىنە كوشكەن.
«ءبىز جوندەلىپ، دايىندالعان، الاڭى بىردەي جاڭا پاتەر الدىق. ءۇيدىڭ قۇرىلىسى كەزىندە بىزگە ۋاقىتشا باسپانا تەگىن بەرىلدى. مۇنداي باعدارلامالار وتە ماڭىزدى، سەبەبى اركىمنىڭ جاڭا تۇرعىن ءۇي كەشەنىنەن پاتەر ساتىپ الۋعا مۇمكىندىگى جوق، اسىرەسە ەسكى ۇيدەگى جىلجىمايتىن مۇلىكتى ساتۋ قيىن»، – دەدى فاريدا يشمەمەتوۆا.
ايتا كەتۋ كەرەك، تۇرعىنداردى ەسكى ۇيلەردەن جايلى پاتەرلەرگە كوشىرۋدى جەدەلدەتۋ ماقساتىندا الماتى اكىمدىگى 2030 جىلعا دەيىنگى رەنوۆاسيالاۋ باعدارلاماسىن ازىرلەدى.
باعدارلاما اياسىندا سەيسميكالىق تۇراقسىز، پايدالانۋ مەرزىمى وتكەن جانە ومىرگە ءقاۋىپ توندىرەتىن ۇيلەردى بۇزىلادى. ولاردىڭ ورنىنا زاماناۋي تۇرعىن ءۇي كەشەندەرى سالىنادى.