كەزدەسۋگە جەتىسۋ اۋدانىنىڭ اكىمى ءلاززات جىلقىبايەۆا، مەملەكەتتىك ورگانداردىڭ وكىلدەرى، قالا اكىمدىگى باسقارمالارىنىڭ ماماندارى، اۋدان كاسىپكەرلەرى جانە تابيعاتتى قورعاۋ پوليسياسىنىڭ قىزمەتكەرلەرى قاتىستى، - دەپ حابارلايدى aqshamnews.kz.
جيىندا اتموسفەرالىق اۋانى قورعاۋعا قاتىستى جاڭا ەكولوگيالىق تالاپتاردى ءىس جۇزىندە ءتۇسىندىرۋ جانە ولاردى كەزەڭ-كەزەڭىمەن ەنگىزۋ تەتىكتەرىنە ەرەكشە نازار اۋدارىلدى. كاسىپكەرلەر تولعاندىرعان سۇراقتارىن قويىپ، ىقتيمال تاۋەكەلدەردى تالقىلادى.
الماتى قالاسى ەكولوگيا جانە قورشاعان ورتا باسقارماسىنىڭ باسشىسى سەرىك ادىلبايەۆ كەزدەسۋدىڭ تەك ءتۇسىندىرۋ سيپاتىندا وتكەنىن اتاپ ءوتتى.
«ءبىزدىڭ مىندەتىمىز – جاڭا ەكولوگيالىق تالاپتاردىڭ ءمانىن جەتكىزۋ، ولاردىڭ نە ءۇشىن ەنگىزىلىپ جاتقانىن ءتۇسىندىرۋ جانە بيزنەسكە تاۋەكەلسىز مەن ايىپپۇلسىز جۇمىس ىستەۋ جولدارىن كورسەتۋ. بۇل قىسىم كورسەتۋ ەمەس، شىعارىندىلار سالاسىندا كەزەڭ-كەزەڭىمەن ءتارتىپ ورناتۋ ماسەلەسى»، – دەدى ول.
ەسكە سالساق، قازاقستان رەسپۋبليكاسىنىڭ ەكولوگيالىق كودەكسىنىڭ 206-بابىن ىسكە اسىرۋ اياسىندا الماتى قالاسىنىڭ اكىمدىگى اتموسفەرالىق اۋانى قورعاۋ قاعيدالارىن ازىرلەگەن بولاتىن. اتالعان قۇجات 2025 جىلى 30 جەلتوقساندا قالا ءماسليحاتىندا بەكىتىلدى.
قۇجات ءتورت نەگىزگى باعىتتى قامتيدى: اۆتوكولىكتەردى پايدالانۋ ءتارتىبىن رەتتەۋ، III ساناتتاعى نىساندارعا قويىلاتىن ەكولوگيالىق تالاپتار، شىعارىندىلار دەڭگەيى تومەن ايماقتى ۇيىمداستىرۋ، سونداي-اق قولايسىز مەتەورولوگيالىق جاعدايدا مونيتورينگ جۇرگىزۋ، سيفرلاندىرۋ جانە جەدەل ارەكەت ەتۋ شارالارى.
جەتىسۋ اۋدانىندا جۇرگىزىلگەن مونيتورينگ ناتيجەسىندە 213 قوعامدىق تاماقتانۋ ورنى، كوممەرسيالىق مونشا مەن تەحنيكالىق قىزمەت كورسەتۋ بەكەتتەرى، سونداي-اق 76 ونەركاسىپتىك كاسىپورىن جۇمىس ىستەيتىنى انىقتالدى. ونىڭ ىشىندە 51 نىسان III ساناتقا جاتادى جانە جيىنتىعىندا اتموسفەرالىق اۋاعا ەلەۋلى جۇكتەمە تۇسىرەدى.
«وسى جىلدان باستاپ ەكولوگيالىق تالاپتاردىڭ ساقتالۋىنا تۇراقتى مونيتورينگ جۇرگىزۋ كوزدەلگەن. ءقازىردىڭ وزىندە پايدالانىلىپ جاتقان وتىن مەن جابدىقتى باعالاپ، ەكولوگيالىق تۇرعىدان ءتيىمدى شەشىمدەرگە كوشۋدى جوسپارلاۋ ماڭىزدى. ءبىز بيزنەستىڭ جاۋاپتى ءارى سانالى ۇستانىمىنا سەنىم ارتامىز»، – دەپ ءسوزىن تۇيىندەدى سەرىك ادىلبايەۆ.