الماتىدا «تاۋەلسىزدىك ۇرپاقتارى» گرانتىنىڭ جەڭىمپازدارىن سالتاناتتى ماراپاتتاۋ ءراسىمى ءوتتى. شارا قالالىق جاستار ساياساتى باسقارماسىنىڭ قولداۋىمەن ۇيىمداستىرىلدى، دەپ حابارلايدى aqshamnews.kz
جاستاردىڭ باستامالارىن قولداۋعا باعىتتالعان بۇل گرانتقا 150-دەن استام ءوتىنىم كەلىپ ءتۇسكەن. ناتيجەسىندە كوميسسيا شەشىمىمەن 6 باعىت بويىنشا 13 ەرەكشە جوبا ۇسىنعان تالانتتى جاستارعا 1 000 000 تەڭگەدەن ۇلەستىرىلدى. اتاپ ايتقاندا، گرانت يەگەرلەرى عىلىم، مادەنيەت، اقپاراتتىق تەحنولوگيالار، بيزنەس، مەديا جانە ۆولونتەرلىك سالالارى بويىنشا ماراپاتتالدى.
«ەلىمىز تاۋەلسىزدىك العاننان بەرى رۋحى مەن ويى ەركىن جاستاردىڭ تۇتاس بۋىنى ءوستى. وتانىمىزدىڭ وركەندەۋىنە ءوز ۇلەستەرىن قوسىپ جاتقان تاۋەلسىزدىك بالالارىنىڭ تولقىنى وسۋدە. پرەزيدەنتتىڭ تاپسىرماسىمەن وسى گرانتتار جاس قازاقستاندىقتاردى قولداۋ ماقساتىندا جۇزەگە اسىرىلىپ كەلەدى. بۇل ولاردىڭ تىڭ يدەيالارى مەن جوبالارىن جۇزەگە اسىرۋعا مۇمكىندىك بەرەدى»، — دەپ اتاپ ءوتتى الماتى قالاسى جاستار ساياساتى باسقارماسىنىڭ جاستاردى الەۋمەتتەندىرۋ جانە جاستار باستامالارىن قولداۋ ءبولىمىنىڭ باسشىسى نۇرسۇلتان بەكقايىروۆ
جوبانىڭ باستى ماقساتى – جاستاردىڭ بەلسەندى ءارى شىعارماشىل قاۋىمداستىعىن قالىپتاستىرۋعا باعىتتالعان باستامالاردى قولداۋ، سونداي-اق جاستاردىڭ قوعامدىق ماڭىزدى شارالارعا قاتىسۋى ارقىلى وتانعا دەگەن سۇيىسپەنشىلىگى مەن پاتريوتتىق سەزىمىن دامىتۋ دەيدى ۇيىمداستىرۋشىلار.
«بۇل جوبانىڭ باستالعانىن الەۋمەتتىك جەلىلەردەن كورىپ، باعىمدى سىناپ كورەيىن دەپ شەشتىم. كوميسسيا شەشىمىنەن كەيىن ۇيىمداستىرۋشىلار “جەڭىمپاز اتاندىڭىز” - دەپ، حابارلاسقاندا قاتتى قۋاندىم. الداعى ۋاقىتتا جوبانى جاستارعا جانە قوعامعا پايداسىن تيگىزۋ ءۇشىن بارىنشا ساپالى جاساۋعا تىرىسامىز»، - دەدى بيزنەس باعىتى بويىنشا گرانت يەسى نۇسىپبايەۆا جۇلدىز.
سالتاناتتى شاراعا قوعام بەلسەندىلەرى، ۇكىمەتتىك ەمەس ۇيىمدارىنىڭ وكىلدەرى جانە بەلسەندى قالا جاستارى قاتىستى. ماراپاتتاۋ راسىمىنەن كەيىن قوناقتار ءۇشىن كونسەرتتىك باعدارلاما ۇيىمداستىرىلدى.