الماتى اكىمدىگى بەكىتكەن ەگجەي-تەگجەيلى جوسپارلاۋدىڭ جاڭا جوبالارى ينجەنەرلىك جەلىلەر ءۇشىن ءوتۋ ارنالارىن قۇرۋدى كوزدەيدى. جاڭا ەتج قالانىڭ 2040 جىلعا دەيىنگى باس جوسپارىنا سايكەس ازىرلەندى، وندا مەگاپوليستى دامىتۋدىڭ مونوسەنتريستىك مودەلىنەن پوليسەنتريستىككە كوشۋ قاعيداسى جاتىر، دەپ حابارلايدى almaty-akshamy.kz
قالالىق جوسپارلاۋ جانە ۋربانيستيكا باسقارماسىنىڭ حابارلاۋىنشا، پوليسەنترلەر جوبالانعان اۋدانداردا ماگيسترالدىق ينجەنەرلىك كوممۋنيكاسيالاردى ءوتۋ ارنالارىن ورنالاستىرۋ جوسپارلانعان. بۇل شارا جول جانە تروتۋار جابىنىن قوپارماي، سونىمەن قاتار، كوگالعا زيان كەلتىرمەي جوندەۋ جۇمىستارىن جۇرگىزۋگە مۇمكىندىك بەرەدى.
«ەتج-دا قىزمەت كورسەتۋشى پەرسونال، جوندەۋ ماتەريالى مەن جابدىقتارى ءۇشىن ۇزىندىعى 27 كم ءوتۋ ارنالارىن ورناتۋ كوزدەلەدى. بۇل ءادىس سامال شاعىن اۋدانداعى قۇرىلىس كەزىندە سىنالعان، ءبىراق تولىق ەنگىزىلمەي، اياقسىز قالعان. مۇنداي ادىسپەن كوممۋنيكاسيا ورناتۋ قىمباتىراق، الايدا ۇزاق مەرزىمدى پەرسپەكتيۆادا ايتارلىقتاي قاراجات ۇنەمدەۋگە مۇمكىندىك بەرەدى»، - دەدى باسقارما وكىلدەرى.
جالپى، ەتج تۇراقتى جانە فۋنكسيونالدى قالالىق كەڭىستىك قۇرۋعا باعىتتالعان. ولار قالا قۇرىلىسىن ايماقتارعا ءبولۋدىڭ، قىزىل سىزىقتاردىڭ، حالىققا الەۋمەتتىك، مادەني جانە كوممۋنالدىق قىزمەت كورسەتۋ نىساندارىن ورنالاستىرۋ ءۇشىن اۋماقتاردى رەزەرۆتەۋدىڭ، كوشە-جول جەلىسىن ۇيىمداستىرۋدىڭ، ينجەنەرلىك كوممۋنيكاسيالاردى جۇرگىزۋدىڭ، اۋماقتاردى اباتتاندىرۋ مەن كوگالداندىرۋدىڭ نەگىزگى باعىتتارىن بەلگىلەيدى.