الماتىنىڭ يندۋستريالدى ايماعىندا Almaty Autoparts Production جاڭا زاۋىتىنىڭ اشىلۋ سالتاناتى ءوتتى.
كاسىپورىن اۆتوموبيل ورىندىقتارىن شىعارۋعا ماماندانعان. ءىس-شاراعا الماتى قالاسى اكىمىنىڭ ورىنباسارى الىشەر ءابدىقادىروۆ، ق ر يندۋستريا جانە قۇرىلىس مينيسترلىگى يندۋستريا كوميتەتىنىڭ ءتوراعاسى ازامات پانبايەۆ، Yongsan كومپانياسىنىڭ ءتوراعاسى پاك چون بوم جانە «استانا موتورس» كومپانياسىنىڭ نەگىزىن قالاۋشى نۇرلان سماعۇلوۆ قاتىستى، دەپ حابارلايدى aqshamnews.kz.
Almaty Autoparts Production زاۋىتى جىلىنا 100 000 جيىنتىق اۆتوموبيل ورىندىقتارىن (Hyundai، Great Wall Motors، Chery برەندتەرى ءۇشىن) وندىرۋگە قاۋقارلى. بۇل اۆتوكومپونەنتتەر يمپورتىنا تاۋەلدىلىكتى ايتارلىقتاي تومەندەتۋگە مۇمكىندىك بەرەدى. كاسىپورىن مۋلتيمەديالىق جۇيەلەر، اۆتوموبيل ورىندىقتارى جانە باسقا دا اۆتوكومپونەنتتەر ءوندىرىسىن بىرىكتىرەتىن تەحنوپاركتىڭ ماڭىزدى بولىگىنە اينالادى.
زاۋىتتىڭ جالپى اۋماعى 4 850 م²، ينۆەستيسيا كولەمى – 4 ملرد تەڭگە. ءبىرىنشى كەزەڭدە 65 جاڭا جۇمىس ورنى قۇرىلدى. قۇرىلىس 2023 جىلدىڭ ءۇشىنشى توقسانىندا باستالىپ، 2025 جىلدىڭ ناۋرىزىندا جاپپاي ءوندىرىس ىسكە قوسىلدى.
«زاۋىتتىڭ اشىلۋى الماتىنىڭ ونەركاسىپتىك الەۋەتىن دامىتۋداعى ماڭىزدى قادام. بۇل جاڭا جۇمىس ورىندارى عانا ەمەس، سونىمەن قاتار قالا ەكونوميكاسىن دامىتۋعا، مامانداردىڭ بىلىكتىلىگىن ارتتىرۋعا جانە جوعارى تەحنولوگيالىق ءوندىرىستى دامىتۋعا قوسىلعان ۇلەس»، – دەءدى الماتى اكىمىنىڭ ورىنباسارى الىشەر ءابدىقادىروۆ.
كاسىپورىننىڭ باستى ماقساتى – اۆتوموبيل كلاستەرىن دامىتۋ، اۆتوكومپونەنتتەر ءوندىرىسىن جەرگىلىكتەندىرۋ جانە ماشينا جاساۋ سالاسىندا بىلىكتى ماماندار دايارلاۋ.
ەسكە سالا كەتەيىك، 2024 جىلى قازاندا الماتىنىڭ يندۋستريالدى ايماعىندا وڭتۇستىك كورەيانىڭ Motrex كورپوراسياسىمەن بىرلەسىپ، جىلىنا 100 000 جيىنتىق مۋلتيمەديالىق قۇرىلعى شىعاراتىن زاۋىت ىسكە قوسىلعان بولاتىن.