قالا تۇرعىندارى باعدارلامامەن تانىسىپ، ءوز ۇسىنىستارىن «الماتىنى دامىتۋ ورتالىعىنىڭ» سايتىندا 2022 جىلدىڭ 1 شىلدەسىنە دەيىن قالدىرا الادى.
الماتى اكىمدىگى «الماتى – ادامدار ءۇشىن جاھاندىق قالا» باعدارلاماسىن ازىرلەدى. وندا مەگاپوليستى 2025 جىلعا دەيىن دامىتۋدىڭ نەگىزگى باسىمدىقتارى مەن 2030 جىلعا دەيىنگى ورتا مەرزىمدى پەرسپەكتيۆالار كورسەتىلگەن، دەپ حابارلايدى Almaty-akshamy.kz
جوبا جەتى بولىمنەن تۇرادى: «جايلى قالالىق ورتا»، «تۇراقتى ەكونوميكالىق ءوسۋ»، «باسقارىلاتىن ۋربانيزاسيا»، «الەۋمەتتىك ورنىقتىلىق پەن تۇراقتىلىق»، «جاسىل الماتى»، «سمارت سيتي»، «ءقاۋىپسىز قالا».
الماتىنى كەڭىستىكتىك دامىتۋدىڭ نەگىزگى مىندەتى – جايلى قالالىق ورتا قۇرۋ جانە قالانىڭ بارلىق اۋداندارىندا ءومىر ءسۇرۋ ساپاسىن ارتتىرۋ. ول ءۇشىن ءۇش باسىم باستاما ايقىندالدى: الماتىنى كوپورتالىقتى دامىتۋ، قوعامدىق كولىكتىڭ دامىعان جۇيەسى جانە اۋدانداردىڭ بايلانىستىلىعى، جاڭا تاريفتىك ساياساتتى ەنگىزۋ جانە شىعىنداردى ازايتۋ ارقىلى تكش قىزمەتتەرىنىڭ ساپاسىن جاقسارتۋ.
قالانىڭ كوپورتالىقتى دامۋى الماتىنىڭ جاڭا باس جوسپارىن بەكىتۋدى كوزدەيدى. مۇندا قوعامدىق، ەكونوميكالىق جانە مادەني بەلسەندىلىكتىڭ جاڭا ورتالىقتارىن قالىپتاستىرۋ؛ تۇراقتى جۇمىس ورىندارىن قۇرۋ؛ ەسكى تۇرعىن ۇيلەردى رەنوۆاسيالاۋ؛ يندۋستريالدى اۋدانداردى قايتا دامىتۋ (الماتى-1)؛ كولىك ينفراقۇرىلىمىن دامىتۋ قاراستىرىلعان.
سونداي-اق، وسى باعىت بويىنشا 2025 جىلعا دەيىن بەس ورتالىقتىڭ شەبەرلىك-جوسپارلارىن ازىرلەۋ جانە بەكىتۋ جوسپارلانۋدا: توقساندىق قۇرىلىس؛ الەۋمەتتىك ينفراقۇرىلىم وبەكتىلەرىنە جانە قوعامدىق كولىككە 15 مينۋتتىق قادامدىق قولجەتىمدىلىك؛ تۇرعىن ۇيلەردىڭ بەلسەندى ءبىرىنشى قاباتى؛ قالانىڭ جاڭا تۇرعىن جانە قوعامدىق عيماراتتارىن سالۋ كەزىندە 100% كەدەرگىسىز ورتا.
2030 جىلعا دەيىن ورتالىقتاردىڭ ەكونوميكالىق ماماندانۋىن ەسكەرە وتىرىپ، ولاردىڭ قۇرىلىمىن قالىپتاستىرۋدى اياقتاۋ بولجانۋدا، اتاپ ايتقاندا: سولتۇستىك – ەكولوگيالىق زيانسىز وندىرىستەر، رەكرەاسيا مەن كوگالداندىرۋعا ارنالعان جاڭا اۋماقتار (ۇاك-نىڭ، باۋم توعايى بويىندا)، دامىعان قىزمەت كورسەتۋ سالاسى؛ شىعىس قاقپاسى – اۋەجاي اۋدانىنداعى لوگيستيكالىق حاب جانە كورمە-ويىن-ساۋىق ورتالىعى، مەديسينا، فارماسيەۆتيكا؛ تاريحي ورتالىق – تۋريزم، دامىعان قىزمەت كورسەتۋ سالاسى؛ باتىس – ءىرى يندۋستريالدى كاسىپورىندار، كولىك-لوگيستيكالىق حاب؛ وڭتۇستىك-باتىس-شاعىن ونەركاسىپ پاركتەرى، ساۋدا، لوگيستيكا.
جايلى قالالىق ورتانى قالىپتاستىرۋدىڭ ماڭىزدى قۇرامداس بولىكتەرى قوعامدىق كولىكتى دامىتۋ جانە اۋدانداردىڭ بايلانىسىن قامتاماسىز ەتۋ، جاڭا تاريفتىك ساياساتتى ەنگىزۋ ءارى شىعىنداردى ازايتۋ ارقىلى تكش قىزمەتتەرىنىڭ ساپاسىن ارتتىرۋ بولىپ تابىلادى.