الماتىنىڭ اسپانىندا قازاقستاننىڭ ەڭ ۇلكەن تۋى جەلبىرەدى

كاسىبي ءپاراشيۋتشى ولەگ توششيەۆ اۋەدە پاراشيۋتپەن سەكىرۋ كەزىندە قازاقستاننىڭ ەڭ ۇلكەن تۋىن جەلبىرەتە جايدى.

ناتيجە قازاقستاننىڭ رەكوردتار كىتابىنا ەندى، دەپ حابارلايدى Almaty-akshamy.kz

تۋدىڭ كولەمى 800 شارشى مەتردى قۇرايدى. ايتا كەتسەك، ەلوردانىڭ باستى فلاگشتوك تۇعىرىندا كوتەرىلەتىن ەڭ ۇلكەن تۋدىڭ كولەمى 450 شارشى مەتر. اسپاندى باعىندىرعان تۋ وسى بىرەگەي وقيعاعا ارنايى جاسالعان.

«بۇگىن ءبىز ەلىمىزدىڭ ەڭ ۇلكەن تۋىنىڭ الماتى اسپانىندا قالاي جەلبىرەگەنىنە كۋا بولدىق. وسى ءساتتىڭ كۋاگەرى جانە ءبىر بولىگى بولۋ، ەلىمىزدىڭ بىرلىگى مەن اسقاق رۋحىن سەزىنۋ مەن ءۇشىن شىنىمەن باقىت»، - دەدى KINES قازاقستان رەكوردتار كىتابىنىڭ وكىلى قۋاندىق قۇدايبەرگەنوۆ.

ول سەكىرۋدىڭ قيىندىعىن دا اتاپ ءوتتى.

«بۇل - شىن مانىندە، وتە ءقاۋىپتى تريۋك، ويتكەنى مۇنداي بيىكتىكتە پاراشيۋتپەن سەكىرۋشىلەر قاتتى سوققان جەلگە تاپ بولۋى مۇمكىن. جۇكتىڭ سالماعىن ەسكەرە وتىرىپ، سەكىرۋ وتە قيىن دەپ ايتا الامىز. مۇنداي ارەكەت بۇرىن الەمدە قولدانىلعان، ءبىراق قازاقستاندا العاش رەت بولىپ وتىر»، - دەپ قوستى قۇدايبەرگەنوۆ.

اكسيانى ەلىمىزدىڭ مادەني-الەۋمەتتىك دامۋىنا قولداۋ كورسەتىپ جۇرگەن كاسىپكەرلەر، مەسەناتتار باستاعان باستاماشىل توپ ۇيىمداستىردى.

ۇيىمداستىرۋشىلاردىڭ ءبىرى جومارت قياستىڭ ايتۋىنشا، بۇل اكسيانىڭ ماقساتى – بارشا قازاقستاندىقتاردىڭ پاتريوتتىق رۋحىن ارتتىرۋ جانە نىعايتۋ، سونداي-اق ۇلتىنا قاراماستان بىر-بىرىنە دەگەن تولەرانتتى كوزقاراستى، بەيبىت اسپان ۇعىمىن ساقتاۋ.

«ءقازىر كوپ ەل ءۇشىن قازاقستان تىنىشتىق پەن بەيبىتشىلىكتىڭ تىرەگى بولىپ سانالادى، مۇنى بارلىق شەتەلدىك قاۋىمداستىقتىڭ وكىلدەرى راستايدى. ەلىمىزدىڭ ەڭ ۇلكەن تۋىنىڭ جەلبىرەۋى تەرەڭ ويدى جانە ەلىمىزدەگى بارشا حالىقتىڭ ءبىرتۇتاس بەيبىت اسپان استىنداعى بىرلىگىن بىلدىرەدى»، – دەدى جومارت قياس.