الماتى وبلىسىندا اقىلى ەكى جول ۋچاسكەسى بار.
«قازاۆتوجول» كومپانياسى «الماتى-قورعاس» اقىلى جولى كۇنىنە قانشا قاراجات تۇسەتىنى جانە ونىڭ قايدا جۇمسالاتىنىن جاريالادى، دەپ حابارلايدى Almaty-akshamy.kz ق ر ييدم باسپا ءسوز قىزمەتىنە سىلتەمە جاساپ.
كومپانيانىڭ مالىمەتىنشە، الماتى وبلىسىندا اقىلى ەكى جول ۋچاسكەسى بار. ولار - «الماتى-شەلەك-قورعاس» جانە «الماتى-قاپشاعاي-تالدىقورعان» جولى. بۇل جولدار جۇك كولىكتەرىنىڭ جۇكتەمەسىنە توتەپ بەرۋ ءۇشىن بەتوننان جاسالعان. «قازاۆتوجول» جشس-نىڭ «الماتى-قورعاس» اقىلى جول بولىگىنىڭ باسشىسى مارات سىرىمباي بۇل باعىتتا جۇرەتىن كولىكتەن كۇنىنە 1 ملن 400 مىڭ تەڭگەگە جۋىق قاراجات تۇسەتىنىن ايتادى.
«الماتى-قورعاس» اقىلى تاس جولى 2018 جىلى پايدالانۋعا بەرىلگەن. 295 شاقىرىمدى تاس جول ءبىرىنشى دارەجەلى 1ب جولىنا جاتادى. كۇنىنە 400 مىڭنان استام كولىك جۇرەدى. اقىلى جولدىڭ ءتاريفى 1-25 تەڭگە ارالىعىندا. جەڭىل كولىكتەر 1 شاقىرىمعا 1 تەڭگە تولەسە، جۇك كولىكتەرىنە باعا باسقاشا. اقىلى جولدىڭ وسى اۋماعىنان كۇنىنە 1 ملن 400 مىڭ تەڭگە قاراجات تۇسەدى»، - دەيدى ول.
مارات سىرىمباي جولدىڭ بۇلىنگەن بولىگىن لەزدە جوندەپ، قىستا قاردان تازارتىپ، تايعاق جەرگە قۇم سەبىلەتىنىن ايتادى.
«كولىكتەن تۇسكەن قاراجات جولدى جوندەۋگە، ونى قالىپتى جاعدايدا ۇستاپ تۇرۋعا جۇمسالادى. بيىل 1200 شارشى مەتر اۋماققا ورتاشا جوندەۋ جۇمىسى جاسالدى. 317 شارشى مەتر اۋماقتا جولدىڭ جارىعى بىتەلدى. سونداي-اق 616 شارشى مەتر اۋماقتى قۇرايتىن اسفالت بەتونىنا جوندەۋ جۇمىسى ءجۇرىپ جاتىر. جاقىندا كۇننىڭ قاتتى ىسۋىنان ءتورت جەردە بەتون كوتەرىلىپ كەتتى. ونى سول كۇنى قايتا جوندەدىك. بۇل جول قىتايعا اپاراتىندىقتان، اسىرەسە، جۇك كولىكتەرى پايدالانادى. الايدا پاندەميا باستالعالى كولىك اعىنى ازايدى. بەتوننان جاسالعان جول اۋىر جۇككە شىدامدى»، - دەيدى جولدىڭ باسشىسى.