الماتىداعى سايالى شاعىن اۋدانىندا 2025 جىلدىڭ سوڭىنا قاراي اۋىسىمدا 200 ادام قابىلدايتىن مساك ورتالىعىنىڭ قۇرىلىسى اياقتالادى
الماتىنىڭ الاتاۋ اۋدانىندا اعىمداعى جىلدىڭ سوڭىنا دەيىن تاعى ءبىر امبۋلاتوريانىڭ قۇرىلىسى اياقتالادى. بۇل تۋرالى قالا باسشىسى ەربولات دوسايەۆ اۋدان تۇرعىندارىمەن كەزدەسۋ بارىسىندا مالىمدەدى.
وسى جىلدىڭ ناۋرىز ايىندا الماتى اكىمىنىڭ تاپسىرماسى بويىنشا جانە جەرگىلىكتى تۇرعىنداردىڭ وتىنىشتەرىن ەسكەرە وتىرىپ، العاشقى مەديسينالىق-سانيتارلىق كومەك ورتالىعىنىڭ (مساك) جاڭا عيماراتى اشىلدى. قازىرگى زامانعى مەديسينالىق مەكەمە قاراسۋ جانە وجەت شاعىن اۋداندارىنىڭ تۇرعىندارى ءۇشىن قول جەتىمدى جەردە ورنالاسقان.
جاڭا بەس قاباتتى مساك ورتالىعى №25 قالالىق ەمحانانىڭ فيليالى بولىپ تابىلادى جانە جاقىن ماڭداعى شاعىن اۋدانداردىڭ 18 مىڭ تۇرعىنىنا قىزمەت كورسەتۋگە ەسەپتەلگەن. ورتالىقتىڭ جوبالىق قۋاتى ءبىر اۋىسىمدا 200 كەلۋشىنى قۇرايدى.
بۇعان دەيىن قاراسۋ شاعىن اۋدانىنىڭ تۇرعىندارى №21 ەمحانا فيليالىنىڭ ەسكى عيماراتىندا مەديسينالىق كومەك العان، وندا امبۋلاتوريا نەبارى 160 شارشى مەتر اۋماقتا ورنالاسقان. جاڭا ورتالىقتىڭ اشىلۋى اۋدان تۇرعىندارىنا قولايلى جاعدايدا ساپالى جانە ۋاقتىلى مەديسينالىق كومەك الۋعا مۇمكىندىك بەرەدى.
«قاراشا ايىندا سايالى شاعىن اۋدانىندا 200 ادام قابىلدايتىن تاعى ءبىر امبۋلاتوريانىڭ قۇرىلىسى اياقتالادى دەپ كۇتىلۋدە»، - دەدى ەربولات دوسايەۆ.
سونداي-اق، تامىز ايىندا مەملەكەتتىك ساراپتاما قورىتىندىسىن الا وتىرىپ، الاتاۋ اۋدانىندا 300 توسەكتىك كوپبەيىندى اۋرۋحانا مەن 200 توسەكتىك پەريناتالدىق ورتالىق، دارابوز شاعىن اۋدانىنىڭ قۇرىلىسى بويىنشا جوبالاۋ-سمەتالىق قۇجاتتاما ازىرلەنۋدە. سونداي-اق، 200 توسەكتىك كوپبەيىندى بالالار اۋرۋحاناسىن سالۋ جوسپارلانۋدا.
ايتا كەتەيىك، وتكەن جىلى الماتىدا ءۇش وتباسىلىق-دارىگەرلىك امبۋلاتوريا پايدالانۋعا بەرىلدى: نۇرشاشقان شاعىن اۋدانىندا (اۋىسىمىنا 100 كەلۋشىگە)، مامىر شاعىن اۋدانىندا (200 كەلۋشىگە) جانە كەمەل شاعىن اۋدانىندا (اۋىسىمىنا 200 كەلۋشىگە)، سونداي-اق جۇمىسشى كەنتىندە 300 كەلۋشىگە ارنالعان ەمحانا جانە بالالارعا شۇعىل مەديسينالىق كومەك ورتالىعىنىڭ جاڭا قابىلداۋ ءبولىمى اشىلدى.
بۇگىندە سايالى شاعىن اۋدانىندا مساك ورتالىعىنىڭ، ايباسوۆ كوشەسىندە مساك ورتالىعىنىڭ جانە №4 جەدەل جاردەم قوسالقى ستانسياسىنىڭ قۇرىلىسى جۇرگىزىلۋدە.
سونداي-اق، №4 قالالىق كلينيكالىق اۋرۋحانانى، بوستاندىق اۋدانىندا كلينيكالىق-دياگنوستيكالىق ورتالىعى (كدو) بار 500 كەلۋشىگە ارنالعان ەمحانانى قايتا جاڭارتۋ بويىنشا قمج باستالدى، تۇركسىب اۋدانىندا كدو-مەن 500 كەلۋشىگە ارنالعان ەمحانا قۇرىلىسىنىڭ جوبالارىنا، ەسكى كورپۋستى بۇزۋعا جانە المالى اۋدانىندا پەرزەنتحانانىڭ جاڭا كورپۋسىن سالۋعا وڭ ساراپتاما بەرىلدى.