الماتىداعى الاتاۋ اۋدانىنىڭ ءبىرقاتار شاعىن اۋداندارىنىڭ 23 مىڭ تۇرعىنى وسى جىلدىڭ سوڭىنا دەيىن سۋمەن قامتاماسىز ەتىلەدى
الماتىنىڭ الاتاۋ اۋدانىن ساپالى ينجەنەرلىك ينفراقۇرىلىممەن قامتاماسىز ەتۋ ءۇشىن جەلىلەردى قايتا قۇرۋ جانە جاڭا سالۋ بويىنشا بەلسەندى جۇمىستار جۇرگىزىلۋدە. بۇل تۋرالى قالا اكىمى ەربولات دوسايەۆ اۋدان تۇرعىندارىمەن كەزدەسۋ بارىسىندا مالىمدەدى.
وزدەرىڭىز بىلەتىندەي، قوسىلعان شاعىن اۋدانداردىڭ (العاباس، تەرەكتى، مادەنيەت جانە بورالداي) تۇرعىندارى ورتالىق ينجەنەرلىك جەلىلەردىڭ بولماۋىنا بايلانىستى ۇزاق جىلدار بويى سەپتيكتەر مەن اۋىز سۋعا ارنالعان جەكە ۇڭعىمالاردى پايدالانعان.
اۋدان تۇرعىندارىن قاجەتتى ينفراقۇرىلىممەن قامتاماسىز ەتۋ ءۇشىن 2024 جىلى العاباس جانە سايالى شاعىن اۋداندارىندا 48،6 كم سۋمەن جابدىقتاۋ جانە سۋ بۇرۋ جەلىلەرىن، سونداي-اق وجەت ش/ا 1ء-شى كارىز سورعى ستانسياسىن (كسس) سالۋ جۇمىستارى اياقتالدى. ناتيجەسىندە اۋداننىڭ 5 مىڭنان استام تۇرعىنى ورتالىق اۋىز سۋمەن جانە كارىزبەن قامتاماسىز ەتىلگەن.
2025 جىلعى جەلتوقساندا بورالداي، اقبۇلاق، شاپاعات، بولاشاق، راحات-مادەنيەت، ايگەرىم شاعىن اۋداندارىنىڭ 23 مىڭ تۇرعىنى ءۇشىن 270 كم سۋمەن جابدىقتاۋ جانە سۋ بۇرۋ جەلىلەرىن سالۋ بويىنشا جۇمىستار اياقتالادى دەپ كۇتىلۋدە.
ايتا كەتەيىك، قالادا ينجەنەرلىك جەلىلەردى جاڭعىرتۋ جانە رەكونسترۋكسيالاۋ بويىنشا كەشەندى شارالار بەلسەندى قابىلدانۋدا. وسىلايشا، بۇل 2025 جىلى سۋمەن جابدىقتاۋ جەلىلەرىنىڭ توزۋىن 52،9% – عا، سۋ بۇرۋ جەلىلەرىنىڭ توزۋىن 53،9% - عا دەيىن تومەندەتۋگە مۇمكىندىك بەرەدى.