الماتىلىقتارعا دەمالىس سايىن قولجەتىمدى باعادا قانت ساتىلادى

10 تونناعا جۋىق قانت كوتەرمە باعامەن 500 تەڭگەدەن، بولشەك ساۋدادا 530 تەڭگەدەن ساتىلدى.

الماتىنىڭ اۋداندارىندا دەمالىس كۇندەرى وتەتىن جارمەڭكەلەردە قانت قولجەتىمدى باعامەن ساتىلادى، دەپ حابارلايدى Almaty-akshamy.kz

الماتى اكىمدىگى قالالىق كاسىپكەرلىك جانە ينۆەستيسيالار باسقارماسى مەن «الماتى» سپك اۋىلشارۋاشىلىق ۇيىمى دەمالىس كۇندەرى وتەتىن جارمەڭكەلەردە قانتتى كوتەرمە جانە بولشەك ساۋدادا ساتۋدى باستادى.

«پيلوتتىق رەجيمدە اكسيا 16 شىلدەدە الماتى قالاسىنىڭ مەدەۋ اۋدانىنداعى جارمەڭكەدە باستالدى، ونىڭ بارىسىندا 10 تونناعا جۋىق قانت كوتەرمە باعامەن 500 تەڭگە/كگ، بولشەك ساۋدادا 530 تەڭگە/كگ ساتىلدى. جاقىن ارادا باسقارما مۇنداي اكسيالاردى بارلىق جارمەڭكەلەردە تۇراقتى تۇردە وتكىزۋدى جوسپارلاپ وتىر»، - دەلىنگەن اكىمدىكتىڭ اقپاراتىندا

ءقازىر قالانىڭ التى اۋدانىندا جارمەڭكە وتۋدە. بۇل رەتتە باسقارما ناۋرىزباي جانە الاتاۋ وڭىرلەرىندە اۋىل شارۋاشىلىعى جارمەڭكەلەرى تۇرعىندار تاراپىنان سۇرانىس بولماعاندىقتان، وتكىزىلمەي جاتقانىن حابارلادى.

«قانتتى جارمەڭكە وتكىزۋ كەزىندە ءار وبلىسقا 10 توننادان 60 تونناعا جۋىق قانت جەتكىزۋ جوسپارلانۋدا. جەرگىلىكتى تۇرعىندار دا، دۇكەن يەلەرى دە قانت ساتىپ الا الادى»، - دەپ قوستى اكىمدىك.

سونداي-اق ولار الماتىداعى 1،6 مىڭعا جۋىق تۇرمىستىق دۇكەندەردى قامتاماسىز ەتۋ ءۇشىن كۇنىنە 40 تونناعا جۋىق قانت ءوندىرىس ورىندارىنان تىكەلەي اكەلىنەتىنىن حابارلادى.