الماتىلىقتارعا ايىپپۇل سالىنۋى مۇمكىن

52 جەدەل ءموبيلدى توپ كەزەكشىلىكتە بولادى.

27 ناۋرىزداعى مالىمەت بويىنشا 985 توننا قوقىس پەن قالدىق شىعارىلعان، دەپ حابارلايدى Almaty-akshamy.kz

«سينوپتيكتەردىڭ بولجاۋىنشا، الماتىدا 28-30 ناۋرىز ارالىعىندا جاڭبىر جاۋادى»، دەپ حابارلادى الماتى اكىمدىگىنىڭ باسپا ءسوز قىزمەتى.

كوممۋنالدىق قىزمەتتەر جاۋىن-شاشىنعا الدىن الا دايىندالىپ، ارىقتاردى تازارتىپ جاتىر. 27 ناۋرىزداعى جاعداي بويىنشا 985 توننا قوقىس پەن قالدىق شىعارىلدى. اكىمدىكتىڭ مالىمەتىنشە، بارلىق ارىق جەلىسى تازارتىلعان.

«سۋ تاسقىنىنىڭ الدىن الۋ ءۇشىن ازاماتتاردان ارىقتاردى، اعىندى سۋ ارنالارى مەن كانالدارعا قوقىس تاستاماۋلارىن سۇرايمىز. سونىمەن قاتار، مۇنداي ارەكەتكە بارعاندار قازاقستاننىڭ اكىمشىلىك قۇقىق بۇزۋشىلىقتار تۋرالى كودەكسىنىڭ (اقبتك) 505-بابىنا سايكەس اكىمشىلىك جاۋاپكەرشىلىككە تارتىلاتىنىن حابارلايمىز»، - دەپ حابارلادى الماتى اكىمدىگى.

ايتا كەتۋ كەرەك، اتالعان كودەكستىڭ 505-بابى بويىنشا 20 اەك (2024 جىلى بۇل 73 840 تەڭگە) مولشەرىندە ايىپپۇل سالۋ كوزدەلگەن.

اكىمدىك جاۋىن-شاشىن كەزەڭىندە سۋ تاسقىنىنىڭ الدىن الۋ ءۇشىن موتوپومپالارمەن جانە سۋدى تەرەڭدەتۋ قۇرالدارىمەن جابدىقتالعان 52 جەدەل ءموبيلدى توپ كەزەكشىلىكتە بولاتىنىن ايتتى. 2 مىڭ قۇم سالىنعان قاپ دايىندالدى. اۋدان اكىمدىكتەرى جۇمىس بارىسىن باقىلاۋ ءۇشىن تاۋلىك بويى كەزەكشىلىك ۇيىمداستىرادى.