ول نەسيە الىپ بەرەمىن دەگەن جەلەۋمەن 40-تان استام ادامنىڭ قاراجاتىن يەمدەنگەن.
الماتى پوليسياسى “Hi-Tech” ءىس-شاراسى اياسىندا تۇرعىندارعا ءجيى كەزدەسەتىن الاياقتىق تۇرلەرى تۋرالى ايتىپ بەردى، – دەپ حابارلايدى Almaty-akshamy.kz
الماتىدا اقپاراتتىق تەحنولوگيالار، سونىڭ ىشىندە ينتەرنەت-الاياقتىق سالاسىنداعى قىلمىستاردى اشۋعا جانە الدىن الۋ تيىمدىلىگىن ارتتىرۋعا باعىتتالعان “Hi-Tech” ءىس-شاراسى اياقتالدى.
«ءىس-شارا كەزەڭىندە كريمينالدىق پوليسيا قىزمەتكەرلەرى اراسىنان مامانداندىرىلعان جەدەل-ىزدەستىرۋ توپتارى قۇرىلدى. اتالعان ءىس-شارا بارىسىندا “كيبەرپول” بولىمشەسى 154 الاياقتىق جاسادى دەگەن كۇدىكپەن 21 ينتەرنەت-الاياقتى ۇستادى. ولاردىڭ اراسىندا ءىرى الاياقتىق جاساعانى ءۇشىن قوستاناي وبلىسىنىڭ پوليسەيلەرى ىزدەپ جۇرگەن 27 جاستاعى م.ەسىمدى ازامات تا بار. الىنعان مالىمەتتەرگە سايكەس، قاسكوي ءۇشىنشى ادامدارعا تاۋارلىق نەسيەلەردى راسىمدەۋمەن اينالىسقان. كەلتىرىلگەن شىعىن كولەمى 6 ميلليون تەڭگەدەن اسادى. ول قاماۋعا الىندى. سونىمەن قاتار وسى كۇندەرى Instagram الەۋمەتتىك جەلىسىندە جالعان اككاۋنت اشىپ، نەسيە تاريحى ناشار ادامدارعا نەسيە الىپ بەرەمىن دەگەن جەلەۋمەن 40-تان استام ادامنىڭ قاراجاتىن يەمدەنگەن 23 جاستاعى ي.ەسىمدى ازامات ۇستالدى. ول دا قاماۋعا الىندى»، دەدى الماتى قالالىق پد كريمينالدىق پوليسيا باسقارماسىنىڭ باستىعى قۋاتبەك ناۋاتوۆ.