الماتى قالاسى تۇتىنۋشىلاردىڭ قۇقىقتارىن قورعاۋ دەپارتامەنتىنە 2021 جىلدىڭ 6 ايىندا 986 ءوتىنىش ءتۇستى. بۇل تۋرالى وڭىرلىك كوممۋنيكاسيالار قىزمەتىندە وتكەن بريفينگتە دەپارتامەنت باسشىسىنىڭ مىندەتىن اتقارۋشى ساۋلە ماحاتوۆا مالىمدەدى، دەپ حابارلايدى almaty-akshamy.kz
سپيكەر ديالوگتىق الاڭداردى تاڭداۋدىڭ كەڭدىگى ازاماتتارعا جازباشا دا، Telegram-بوت جەلىسى ارقىلى دا جۇگىنۋگە، سونداي-اق باسشىلاردىڭ قابىلداۋىنا جەكە جازىلۋعا مۇمكىندىك بەرگەنىن ايتتى. سونداي-اق وتكەن جىلدىڭ ورتاسىنان باستاپ تۇتىنۋشىلاردىڭ قۇقىقتارىن قورعاۋ جۇيەسى وزگەردى.
ساۋلە ماحاتوۆانىڭ ايتۋىنشا، قازىرگى جاعدايدا ءار ادام ءومىر بويى تاۋارلاردى، جۇمىستار مەن قىزمەتتەردى تۇتىنۋشى، تۇتىنۋ نارىعىندا قالىپتاسقان قۇقىقتىق قاتىناستاردىڭ قاتىسۋشىسى رەتىندە ارەكەت ەتەدى. 2021 جىلدىڭ باسىنان باستاپ تۇتىنۋشىلاردان تۇسكەن وتىنىشتەردىڭ باسىم بولىگى بولشەك جانە ەلەكتروندىق ساۋداعا، تۇرمىستىق قىزمەتتەردى الۋ فاكتىلەرىنە جانە تكش قىزمەتتەرى سالاسىنا قاتىستى بولدى.
"ناقتى قايتارۋدىڭ جالپى سوماسى 28 425 969 تەڭگەنى قۇرادى. 9 تەكسەرۋ جۇرگىزىلدى، ولاردا زاڭ بۇزۋشىلىقتارى راستالمادى. قالعان بارلىق فاكتىلەر بويىنشا بۇزۋشىلىقتاردى جويۋ تۋرالى شەشىم شىعارىلىپ، ايىپپۇل سالىندى"، – دەپ حابارلادى الماتى قالاسى تۇتىنۋشىلاردىڭ قۇقىقتارىن قورعاۋ دەپارتامەنتىنىڭ وكىلى.
الماتىلىق تۇتىنۋشىلاردىڭ شاعىمدارىنىڭ سپەكترى – بۇل ساپاسىز تاۋار مەن قىزمەتتەر ءۇشىن قارجىنىڭ قايتارىلماۋى، تاۋاردى ايىرباستاۋدان نەمەسە قايتارۋدان باس تارتۋ، الىنعان قىزمەتتەر ساپاسىنىڭ تومەندىگى.
س. ماحاتوۆا 2020 جىل تۇتىنۋشىلاردىڭ قۇقىقتارىن قورعاۋ سالاسىنداعى ۇلكەن وزگەرىستەردىڭ باستاۋى بولعانىن ايتتى.
"2020 جىلعى 25 ماۋسىمدا "تۇتىنۋشىلاردىڭ قۇقىقتارىن قورعاۋ تۋرالى" زاڭعا تۇزەتۋلەردىڭ 1-توپتاماسى قابىلداندى. بۇل ماڭىزدى قادام تۇتىنۋشىلاردىڭ شاعىمدارىن قاراۋدىڭ 3 ساتىلى مەحانيزمىن (ساتۋشى مەملەكەتتىك ورگاندار – سوت) ىسكە قوسۋعا، "مەملەكەتتىك" جانە "قوعامدىق" باقىلاۋدى ەنگىزۋگە، كاسىپقويلار قاتارىنان قۇقىق قورعاۋشىلار ءتىزىمىن قالىپتاستىرۋعا كومەكتەستى"، – دەدى سپيكەر.
جاڭا مەحانيزم ساتۋشىنىڭ تۇتىنۋشىلاردىڭ شاعىمىنا جاۋاپ بەرۋ مىندەتتەمەسىن، تۇتىنۋشىنىڭ قۇقىقتارىن قامتاماسىز ەتۋ الگوريتمىن قاراستىرادى. ول ءۇشىن تۇتىنۋشىلاردىڭ شاعىمدارىن قاراۋدىڭ ءۇش ساتىلى جۇيەسى ەنگىزىلدى.
سونىمەن، ءبىرىنشى كەزەڭدە ساتۋشى ساتىپ الۋشىنىڭ شاعىمىن ءوز بەتىنشە نەمەسە تۇتىنۋشىلاردىڭ قۇقىقتارىن قورعاۋ ۇيىمدارىن تارتا وتىرىپ قاراۋعا مىندەتتى.
"بۇل شاعىمداردى وسى جەردە جانە ءقازىر بەيبىت جولمەن شەشۋگە بولاتىن العاشقى كەزەڭ. بۇل جاعدايدا ۇكىمەتتىك ەمەس ۇيىمدار داۋدى سوتقا دەيىن رەتتەۋ سۋبەكتىلەرى رەتىندە ارەكەت ەتەدى. ەكىنشى ساتى مەملەكەتتىڭ قوسىلۋىن كوزدەيدى. ياعني، ەگەر ساتۋشى كەلىسكىسى كەلمەسە، شاعىم تۇتىنۋشىلاردىڭ قۇقىقتارىن قورعاۋ كوميتەتىنە نەمەسە باسقا مامانداندىرىلعان ورگانعا جىبەرىلەدى. مىسالى، ەگەر ساتۋشى تارازىنى بۇراپ تاستاسا نەمەسە ينتەرنەت-دۇكەن تاۋاردى جىبەرمەسە، وندا ول الاياقتىققا "تارتىلادى" جانە ءىىم ورگاندارىنىڭ جۇمىس سالاسى بولادى"، – دەپ ءتۇسىندىردى ساۋلە ماحاتوۆا.
سوتقا جۇگىنۋ - شاعىمدى قاراۋدىڭ سوڭعى ساتىسى. كاسىپكەرلەرگە جانە ۇكىمەتتىك ەمەس ۇيىمدارعا ماسەلەنى مەملەكەتتىڭ قاتىسۋىنسىز شەشۋگە مۇمكىندىك بەرىلەدى.
تۇتىنۋشىلارعا، بيزنەسكە جانە مەملەكەتتىك ورگاندارعا ىڭعايلى بولۋ ءۇشىن 2021 جىلعى 1 قاڭتاردان باستاپ شاعىمداردى قابىلداۋ مەن قاراۋدىڭ e-tutynushy.kz ءبىرىڭعاي اقپاراتتىق جۇيەسى ىسكە قوسىلدى.