اۋىز سۋ ساپاسى تاۋلىك بويى قاداعالانادى. تىرشىلىك كوزى تۇتىنۋشىعا جەتپەس بۇرىن ابدەن تازارتىلادى. تاۋ سۋى ارنايى دوڭگەلەنگەن قاۋىزدارعا جينالىپ، سوندا تۇندىرىلادى. تۇندىرىلعان ءمولدىر سۋ ءارى قاراي سۇزگى ستانساسىنا بارىپ قۇيىلادى.
«الماتى سۋ» مەكەمەسىنىڭ ماماندارى حالىقتى تازا سۋمەن قامتۋ ءۇشىن جىلىنا 70 مىڭعا جۋىق سىناما الادى، دەپ حابارلايدى Almaty-akshamy.kz Almaty.tv-گە سىلتەمە جاساپ.
«الماتى سۋ» مەكەمەسىنىڭ ماماندارى حالىقتى تازا سۋمەن قامتۋ ءۇشىن جىلىنا 70 مىڭعا جۋىق سىناما الادى ەكەن. ال، الماتىلىقتار كۇنىنە 700 مىڭ تەكشە مەتر سۋ تۇتىنادى. بۇل سۇرانىستى جابۋ ءۇشىن ءقازىر قالادا ەكى سۋ ءسۇزۋ ستانساسى جۇمىس ىستەيدى. جىل سوڭىندا تاعى بىرەۋى ىسكە قوسىلادى. «سۇزگىدەن وتكەن سۋ تازا سۋ رەزەرۆۋارىنا بارادى. ول جەردە سۋدى ءبىز تاعى دا زالالسىزداندىرامىز. بۇل ەتاپ ۇزدىكسىز جۇرەدى جالپى 24-تە 7»، – دەدى قالانى سۋمەن قامتىپ وتىرعان باس سۋ تازارتۋ عيماراتىنىڭ ينجەنەر-تەحنولوگى ۇلبوسىن بۇركىتوۆا.
بىرنەشە كەزەڭدىك سۇزگىدەن وتكەننەن كەيىن سۋ زالالسىزداندىرىلادى. زالالسىزداندىرۋ ءۇشىن ارنايى قاراپايىم تۇز قولدانىلادى. تۇز بەلگىلى ىدىسقا سالىنعاننان كەيىن ارنايى بوشكەگە اپارىپ توگىلەدى. سول جەردە ەلەكتروليز پروسەسىنەن وتەدى. ناتيجەسىندە ناتريي ءحلوريدى الىنادى. الىنعان ناتريي ءحلوريدى سۋمەن ارالاستىرىلىپ، سۋىمىز تازارتىلادى.
جالپى، الماتىنىڭ 40 پايىزى تاۋدان كەلەتىن وزەندەر مەن 60 پايىزى جەراستى سۋلارى ارقىلى اۋىز سۋمەن قامتاماسىز ەتىلەدى. بۇل بەكەت ارقىلى بوستاندىق پەن المالى اۋدانى سۋ تۇتىنىپ وتىر. قالا بويىنشا ءقازىر وسى سياقتى بىرنەشە ستانسا سالۋ جوسپارلانعان. بىرەۋى بيىل جىل سوڭىندا ىسكە قوسىلماق.
«ول سالىنىپ بىتەتىن بولسا، قالانىڭ 35 مىڭعا جۋىق، ياعني ناۋرىزباي اۋدانىنىڭ 35 مىڭعا جۋىق تۇرعىنى ساپالى اۋىزسۋمەن قامتاماسىز ەتىلمەك. ول جەردە قارعالى وزەنىندە سۇزگى ستانساسى سالىنىپ جاتىر»، - دەدى «الماتى سۋ» مكك رەسمي وكىلى اقبوتا جىلىسوۆا.
سۋدىڭ قۇرامى حالىققا جەتكەن سوڭ دا حيميالىق-باكتەريولوگيالىق تەكسەرىستەن ءوتىپ، ساراپتالىپ وتىرادى. ول ءۇشىن ماماندار مەكتەپ، ەمحانا سياقتى ورىنداردان كۇندە سىناما الادى.
«سۋدى قورىقپاي قولدانۋىڭىزعا بولادى. سەبەبى تۇتىنۋشىلارعا بەرەتىن سۋدى ءبىز ساعات سايىن تەكسەرىپ وتىرامىز. ەگەر ءسال وزگەرىس بولسا، ءبىز سول جەرگىلىكتى تەكسەرىپ وتىرعان مەكەمەگە حابارلاسىپ ايتىپ تۇرامىز»، – دەدى حيميالىق-باكتەريولوگيالىق زەرتحانا باسشىسى كۇلشات تابايەۆا.
سونداي-اق ماماندار سۋدىڭ كەرمەكتىگىن، ءتۇسىن، ءدامى مەن ءيىسىن دە تەكسەرەدى.