سوڭعى 10 جىلدا قالا وتە جىلدام ءارى رەتسىز ءوستى.
مەملەكەت باسشىسى الماتىنى دامىتۋ ماسەلەلەرى جونىندە كەڭەس وتكىزدى، دەپ حابارلايدى Almaty-akshamy.kz
جيىندى اشقان مەملەكەت باسشىسى بىلتىر كۇزدە الماتى جۇرتشىلىعىمەن كەزدەسۋ بارىسىندا قالانى دامىتۋدىڭ باستى باعىتتارى ايقىندالعانىن اتاپ ءوتىپ، ناتيجەسىندە الماتىنى دامىتۋدىڭ 2030 جىلعا دەيىنگى باعدارلاماسى قابىلدانىپ، شاھاردىڭ 2040 جىلعا دەيىنگى باس جوسپارى بەكىتىلگەنىن ايتتى.
«الداعى 20 جىلدا الماتى حالقىنىڭ سانى 3 ميلليونعا جۋىقتايدى دەگەن بولجام بار. بولاشاقتا قالا ىشىندەگى بەس اۋماق ورتالىق رەتىندە داميدى. سوندا ورتالىقتاعى قازىرگى احۋال ءبىرشاما جەڭىلدەپ، بارلىق اۋدانعا بىردەي سالماق تۇسەدى. سوڭعى 10 جىلدا قالا وتە جىلدام ءارى رەتسىز ءوستى. الماتىنىڭ اۋماعى ەكى ەسەدەن استام كەڭەيدى. ءبىراق ينفراقۇرىلىمنىڭ دامۋى ءار جەردە ءارتۇرلى بولىپ وتىر. قالادا تۇرعىندار سانى ورتاشا العاندا جىل سايىن 70 مىڭ ادامعا كوبەيىپ كەلەدى. جۇمىسقا، ساباققا بارۋ ءۇشىن ىرگەلەس ەلدى مەكەندەردەن كۇن سايىن 500 مىڭ ادام الماتىعا كەلىپ كەتەدى. مۇنداي تۇيتكىلدەردى ۋاقتىلى انىقتاپ، دەر كەزىندە شەشىپ وتىرۋ قاجەت»، دەدى مەملەكەت باسشىسى.
كەڭەس بارىسىندا قالانىڭ كوممۋنالدىق، جول جانە الەۋمەتتىك ينفراقۇرىلىمىن دامىتۋ، سونداي-اق ءبىلىم، ەكولوگيا جانە مەديسينا سالالارىندا قوردالانىپ قالعان پروبلەمالاردى شەشۋ جولدارى تالقىلاندى.
سونىمەن قاتار جيىن بارىسىندا الماتى قالاسىنىڭ اكىمى ەربولات دوسايەۆ، پرەمەر-مينيستردىڭ ءبىرىنشى ورىنباسارى رومان سكليار، پرەمەر-مينيستردىڭ ورىنباسارى – ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ءسوز سويلەدى.