الماتىدا سۋ تاسقىنىنان زارداپ شەككەن وڭىرلەرگە 10 توننادان استام گۋمانيتارلىق كومەك جونەلتىلدى، دەپ حابارلايدى almaty-akshamy.kz
المالى اۋدانىنىڭ كوميۋنيتي ورتالىعى بازاسىندا اشىلعان قابىلداۋ پۋنكتى 29 ناۋرىزدان باستاپ جۇمىس ىستەيدى. كۇن سايىن الماتىلىقتار زارداپ شەككەن ايماقتارعا ۇلەس قوسىپ، قاجەتتى زاتتاردى اكەلىپ جاتتى. قالا تۇرعىندارى، كاسىپكەرلەر مەن بەلسەندى جاستار دا كومەك قولىن سوزدى. سونىڭ ناتيجەسىندە 6 كۇننىڭ ىشىندە 10 تونناعا جۋىق گۋمانيتارلىق كومەك جينالدى. اتاپ ايتقاندا، 2،5 توننادان استام كيىم، 1 توننا گيگيەنا قۇرالدارى، 3،5 توننادان استام ازىق-تۇلىك، تۇرمىستىق زاتتار جانە ت.ب. بار.
گۋمانيتارلىق كومەك قابىلداۋ پۋنكتىنىڭ جۇمىسىنا قالانىڭ 30-دان استام ءىرى ۆولونتەرلىك ۇيىمىنان 100-دەن استام ەرىكتى جۇمىلدىرىلدى. ءوز كەزەگىندە جاستار ساياساتى باسقارماسى يگى ىسكە اتسالىسقان الماتىلىقتارعا العىس بىلدىرەدى. سونداي-اق، باسقارما ەرىكتىلەردىڭ ەڭبەكقورلىعى مەن قالا تۇرعىندارىنىڭ ارقاسىندا سۋ باسقان ايماقتارعا قىسقا مەرزىمدە كومەك كورسەتە الاتىنىن اتادى.
ەستەرىڭىزگە سالا كەتەيىك، گۋمانيتارلىق كومەك قابىلداۋ پۋنكتى اپتانىڭ سوڭىنا دەيىن المالى اۋدانى، بايتۇرسىنوۆ كوشەسى، 22/1 مەكەنجايىندا جۇمىس ىستەيدى، جۇمىس ۋاقىتى 10:00-دەن 19:00-گە دەيىن
قابىلداناتىن گۋمانيتارلىق كومەك تۇرلەرى: ازىق-تۇلىك، اۋىز سۋ، دارى-دارمەكتەر مەن مەديسينالىق كەرەك-جاراقتار، كيىم (جىلى كيىم، اياق كيىم، ءىش كيىم، شۇلىق جانە ت.ب.)، زاتتار (كورپە، ۇيىقتايتىن قاپ، جاستىق جانە ت.ب.)، شارۋاشىلىق تاۋارلارى (شاتىر، توسەنىش، تەرموس، شام، پاۋەربانك، شاينەك، بالالار ىدىستارى، ەمىزىك) جانە گيگيەنا قۇرالدارى (پامپەرس، ايەلدەر گيگيەناسى، سابىن، ءتىس پاستاسى، سۋسابىندار، مايلىق، دارەتحانا قاعازى، جۋعىش زاتتار جانە ت.ب.).
