جۇمىسشى ماماندىقتارى جىلى: الماتىدا كوللەدج ستۋدەنتتەرى اراسىندا WorldSkills Almaty-2025 چەمپيوناتى ءوتتى
الماتىدا WorldSkills Almaty-2025 كاسىبي شەبەرلىك بويىنشا X وڭىرلىك چەمپيوناتى ءوتىپ جاتىر. وعان قالانىڭ 200-دەن استام كوللەدج ستۋدەنتى قاتىسۋدا. بيىلعى چەمپيونات ەرەكشە مانگە يە، ويتكەنى ول مەملەكەت باسشىسى جاريالاعان جۇمىسشى ماماندىقتارى جىلى اياسىندا ۇيىمداستىرىلىپ وتىر. بۇل باستاما تەحنيكالىق جانە كاسىپتىك ءبىلىمنىڭ بەدەلىن ارتتىرۋعا، سونداي-اق جاستار اراسىندا جۇمىسشى ماماندىقتاردى تانىمال ەتۋگە باعىتتالعان، دەپ حابارلايدى aqshamnews.kz
الماتىدا WorldSkills قوزعالىسىنا بەلسەندى قولداۋ كورسەتىلەدى. بۇگىن جارىسقا قاتىسۋشىلارمەن الماتى اكىمى ەربولات دوسايەۆ كەزدەسىپ، قاتىسۋشىلارمەن اڭگىمەلەسىپ، جۇمىستارىمەن تانىستى.
ەربولات دوسايەۆ قالا اكىمدىگى ستۋدەنت جاستار اراسىندا جۇمىسشى ماماندىقتاردىڭ دامۋىن قولدايتىنىن جانە كەيبىر ماماندىق بويىنشا گرانت ءبولۋ مۇمكىندىگىن قاراستىرىپ جاتقانىن اتاپ ءوتتى. قالا اكىمى تەحنيكالىق جانە كاسىپتىك ءبىلىمنىڭ بەدەلىن ارتتىرۋعا باعىتتالعان مۇنداي ءىس-شارالاردىڭ ماڭىزدىلىعىن دا ەرەكشە ايتتى.
سايىس ينجەنەريا جانە IT-دەن باستاپ قىزمەت كورسەتۋ، ديزاين، قۇرىلىس جانە اۆتوكولىكتى دياگنوستيكاعا دەيىنگى كوپتەگەن قۇزىرەتتى قامتيدى. جاس ماماندار تاجىريبەلىك داعدىسىن كورسەتىپ وتىر: سانتەحنيكالىق جابدىقتاردى ورناتادى، كابەلدىك جەلىلەردى تارتادى، ەلەكترونيكا جوبالاۋ جانە جيناۋ، ءموبيلدى قوسىمشالار مەن گرافيكالىق ديزاين جاسايدى، 3D-پرينتەردە بۇيىمدار شىعارادى.
شىعارماشىلىق باعىتقا دا ەرەكشە كوڭىل ءبولىندى: قاتىسۋشىلار كيىم ۇلگىلەرىن ازىرلەپ، ۆيترينالاردى بەزەندىرىپ، اسپازدىق تاعامدار دايىنداپ، كۇردەلى شاشتاراز تەحنيكاسىن ورىندايدى. بايقاۋعا قاتىسۋشىلار تەلەكوممۋنيكاسيا جانە اۆتوكولىكتەردى تەحنيكالىق قىزمەت كورسەتۋ سالاسىندا دا كاسىبي شەبەرلىگىن كورسەتۋدە.
جارىسقا قاتىسۋشىنىڭ ءبىرى الماتى قۇرىلىس-تەحنيكالىق كوللەدجىنىڭ 17 جاستاعى ستۋدەنتى دميتريي كليموۆ «سانتەحنيكا جانە جىلىتۋ» قۇزىرەتىندە ءبىلىمى مەن داعدىسىن كورسەتۋدە. ول كوللەدجدە العان ءبىلىمىن كۇندەلىكتى ومىردە دە قولدانادى.
«بىزگە تاپسىرما بەرىلدى، مەن رادياتور ورناتىپ، پەشتى قوستىم، راكوۆينا، ۋنيتاز جانە كارىز جۇيەسىن ورناتتىم. بۇلاردىڭ ءبارىن بىزگە كوللەدجدە ۇيرەتەدى. سانتەحنيكا باعىتىن سانالى تۇردە تاڭدادىم، سەبەبى بۇل سۇرانىسقا يە ءارى بولاشاعى بار سالا دەپ سانايمىن. ءوز ءبىلىمىمدى ۇيدە دە قولدانامىن. بىردە ۇيدە ۋنيتاز بۇزىلىپ قالدى، ونى ءوزىم جوندەدىم. انام شەبەر شاقىرتۋدىڭ قاجەتى بولماعانىنا قۋاندى»، - دەدى دميتريي كليموۆ.
تاعى ءبىر قاتىسۋشى بوتا ەردەنباەر وقۋىن تەلەكوممۋنيكاسيا سالاسىنداعى ناقتى جۇمىسىمەن ۇشتاستىرىپ ءجۇر جانە بولاشاقتا پروۆايدەرلىك كومپانيا اشۋدى ارماندايدى. بوتاعا بۇل سالاعا قىزىعۋشىلىق ءجاسوسپىرىم شاعىندا-اق پايدا بولعان، ول كەزدە ينتەرنەتتىڭ قالاي جۇمىس ىستەيتىنىنە قىزىعا باستاعان.
«سالادا ماماندار تاپشى، ال بىلىكتى كادرلارعا سۇرانىس وتە جوعارى. كوپ ادام وسى ماماندىققا قىزىعۋشىلىق تانىتسا دەيمىن. مەن ەڭبەك نارىعىنداعى باعامدى ءقازىردىڭ وزىندە سەزىنىپ وتىرمىن – بۇل ءالى باستاماسى عانا. كوللەدجدە وقىپ ءجۇرىپ، بوس ۋاقىتىمدا جۇيە اكىمشىسى بولىپ جۇمىس ىستەپ، اقشا تابامىن. بولاشاقتا IT-كومپانيامدى اشقىم كەلەدى»، - دەدى بوتا ەردەنباەر.
بايقاۋ جۇمىستارىن 500-دەن استام ساراپشى مەن جۇمىس بەرۋشى باعالايدى. جەڭىمپازدار وسى جىلدىڭ 14 ساۋىرىندە انىقتالادى. ماراپاتتاۋ ءراسىمى سول كۇنى وقۋشىلار سارايىندا وتەدى.
ساراپشىنىڭ ءبىرى تاڭشولپان تولەندييەۆا تەحنيكالىق عىلىمدار ماگيسترى ءارى وقىتۋشى. ول اۆتومەحانيكا سالاسىنداعى ساناۋلى ايەل ماماننىڭ ءبىرى. الماتى اكىمدىگىنىڭ قولداۋىمەن تولەندييەۆا گەرمانيادا تاعىلىمدامادان ءوتىپ، EuroSkills چەمپيوناتىنىڭ ساراپشىسى اتاندى.
«ستۋدەنتتەر تاپسىرمالاردى تولىق ورىندايدى. ءۇش جىل ىشىندە ءبىز ولارعا مەحانيكانىڭ نەگىزدەرىمەن قاتار زاماناۋي تەحنولوگيانى دا ۇيرەتەمىز، وسىلايشا تۇلەكتەر ەڭبەك نارىعىندا باسەكەگە قابىلەتتى بولادى. مىسالى، قاتىسۋشىلار پورشەن ساقينالارىن اۋىستىرىپ، قوزعالتقىشتى بولشەكتەپ-جيناۋمەن، بەرىلىس قورابىمەن جۇمىس ىستەۋمەن اينالىسادى، سونداي-اق، شىن اۆتوكولىككە دياگنوستيكا جۇرگىزىپ، اقاۋلاردى جويادى»، – دەدى كوللەدج وقىتۋشىسى، EuroSkills حالىقارالىق ساراپشىسى تاڭشولپان تولەندييەۆا.
چەمپيونات اياسىندا كاسىبي باعدار بەرۋ جۇمىستارى دا بەلسەندى جۇرگىزىلۋدە: 15 مىڭنان استام مەكتەپ وقۋشىسى ءىس-شاراعا قاتىسىپ، جۇمىسشى ماماندىقتار بويىنشا وقۋعا ءوتىنىش بەردى.
بۇگىندە الماتىدا 88 كوللەدج جۇمىس ىستەيدى، وندا 85 مىڭنان استام ستۋدەنت وقيدى. 22 مەملەكەتتىك كوللەدجدە جۇمىسشى مامانداردى دايارلاۋ تولىعىمەن قالا اكىمدىگى ەسەبىنەن قارجىلاندىرىلادى.
انىقتاما ءۇشىن:
WorldSkills Almaty-2025 چەمپيوناتىنىڭ جۇلدە قورى شامامەن 10 ميلليون تەڭگە. 30 نەگىزگى قۇزىرەت بويىنشا جەڭىمپازدارعا اقشالاي سىيلىق تابىستالادى: I ورىنعا — 150 000 تەڭگە، II ورىنعا — 100 000 تەڭگە، III ورىنعا — 50 000 تەڭگە. سالتاناتتى ماراپاتتاۋ ءراسىمى 14 ساۋىردە وقۋشىلار سارايىندا وتەدى. وڭىرلىك كەزەڭ جەڭىمپازدارى WorldSkills Kazakhstan-2025 رەسپۋبليكالىق چەمپيوناتىندا الماتىنىڭ اتىنان قاتىسادى. توپ جارىپ، ۇزدىك اتانعاندار 2026 جىلى شانحايدا وتەتىن حالىقارالىق چەمپيوناتتا قازاقستاننىڭ نامىسىن قورعايدى.