جاستار ساياساتى باسقارماسىنىڭ قولداۋىمەن جۇزەگە اسىرىلادى.
بالالار ءۇيىنىڭ جوعارى سىنىپ وقۋشىلارىنىڭ بولاشاق ماماندىعىن جانە وقۋ ورنىن تاڭداۋىنا كومەكتەسۋ ءۇشىن الماتىدا «بولاشاق» جوباسى جۇمىس ىستەيدى. وكق الاڭىندا بريفينگكە قاتىسقان «QAMQOR CHARITY» قوعامدىق قورىنىڭ ءتورايىمى، الماتى قالاسى اكىمى جانىنداعى جاستار كەڭەسىنىڭ مۇشەسى باعدات اناربايەۆا ءوز جۇمىسىنا توقتالدى، دەپ حابارلايدى Almaty-akshamy.kz.
«الماتى قالاسىنىڭ ەرىكتىلەرى «بولاشاق» جوباسى اياسىندا اتا-اناسىنىڭ قامقورلىعىنسىز قالعان جاسوسپىرىمدەر مەن قيىن ومىرلىك جاعدايدا قالعان جاستاردى الەۋمەتتەندىرۋگە كومەكتەسۋ بويىنشا كەشەندى شارالاردى جۇزەگە اسىرۋدا. اتاپ ايتقاندا، ەرىكتىلەر قالاداعى بالالار ۇيلەرى مەن الەۋمەتتىك ورتالىقتاردا كاسىپتىك باعدار بەرۋ، قۇقىقتىق ساۋاتتىلىققا قىسقا مەرزىمدى وقىتۋ، بوس ۋاقىتتى ۇيىمداستىرۋ، ىنتالاندىرۋ كەزدەسۋلەرى، مادەني ءىس-شارالار، تاعىلىمدامالار جانە ت.ب. وتكىزەدى»، - دەدى باعدات اناربايەۆا.
وسى جوبا اياسىندا ەرىكتىلەر جەتىم بالالارعا ارنالعان «جانۇيا» مامانداندىرىلعان كەشەنىندە، №1 وبلىستىق بالالار ۇيىندە، سوس بالالار اۋىلىندا، الماتى قالاسىنداعى «جاستار ءۇيى» الەۋمەتتىك مەكەمەلەر تۇلەكتەرىنە ارنالعان بەيىمدەۋ جانە قولداۋ ورتالىعىندا جۇمىس جاساۋدا. بارلىعى 12 مەن 29 جاس ارالىعىنداعى 100-دەن استام بالالار مەن جاسوسپىرىمدەر قامتىلدى.
بۇگىنگى كۇنى ەرىكتىلەر ات سپورتى كلۋبىنا، سيرككە تەگىن ساياحاتتار، قالا بويىنشا ەكسكۋرسيالار، پروفيلاكتيكالىق ستوماتولوگيالىق تەكسەرۋلەر، كينوفيلمدەر كورسەتۋ جانە باسقا دا تانىمدىق جانە مادەني شارالاردى ۇيىمداستىردى. سونداي-اق ۆولونتەرلار بالالار مەن جاستاردىڭ كۋميرلەرىمەن 23 موتيۆاسيالىق كەزدەسۋ ۇيىمداستىردى. ۆولونتەرلەر بالالارعا ارنالعان 30-دان استام تەگىن ۇيىرمەلەر مەن سەكسيالاردى اشۋدى، قازىرگى ماماندىقتار بويىنشا قىسقا مەرزىمدى كۋرستاردى وقىتۋدى جوسپارلاپ وتىر.
وسى جوبا اياسىندا الداعى ۋاقىتتا جوعارى وقۋ ورىندارىنا/ورتا ءبىلىم بەرۋ مەكەمەلەرىنە تۇسۋگە كومەكتەسۋ جانە اتا-اناسىنىڭ قامقورلىعىنسىز قالعان جاستار مەن جاسوسپىرىمدەردى جۇمىسقا ورنالاستىرۋ بويىنشا جۇمىستار جوسپارلانۋدا.
بۇل جوبا اياسىنداعى بارلىق ءىس-شارالار دەمەۋشىلەر مەن الماتى قالاسى جاستار ساياساتى باسقارماسىنىڭ قولداۋىمەن جۇزەگە اسىرىلادى.