گۋمانيتارلىق كومەكتى جيناۋ جۇمىسىنا 30-عا جۋىق ءىرى ۆولونتەرلىك ۇيىمدار كىرىسكەن. وسى كەزگە دەيىن 300 كەلى گۋمانيتارلىق كومەك جينالىپتى. بۇل تۋرالى وڭىرلىك كوممۋنيكاسيالار قىزمەتىنىڭ بريفينگىندە «QAMQOR CHARITY» قوعامدىق قورىنىڭ وكىلدەرى ءمالىم ەتتى، دەپ حابارلايدى Almaty-akshamy.kz.
ۆولونتەرلەر گۋمانيتارلىق كومەكتى جيناۋدا الماتىلىقتاردىڭ ەرەكشە بەلسەندىلىگىن اتاپ ءوتتى. گۋمانيتارلىق كومەكتى جيناۋ تۋرالى حابارلاما حابارلانا سالىسىمەن ۆولونتەرلەرگە بۇل قايعىلى جاعدايعا بەي-جاي قارامايتىن كوپتەگەن تۇرعىندار كەلىپ، ءوز كومەكتەرىن ۇسىنعان.
«اباي وبلىسىنداعى جاعداي ەشكىمدى بەي-جاي قالدىرمادى. وسىعان بايلانىستى الماتى قالاسىنىڭ ەرىكتىلەرى مەن ۆولونتەرلىك ۇيىمدارى بىرلەسىپ، گۋمانيتارلىق كومەك جيناۋ قورىن ۇيىمداستىردى. دەيتۇرعانمەن، بۇل ىستە ەڭ العاشقىلاردىڭ ءبىرى بولىپ ءبىزدىڭ تۇرعىندار باستاما كوتەردى. بىزدەن كوپتەگەن تۇرعىندار شىعىپ، كومەك قولىن سوزۋعا تىلەكتەستىكتەرىن ءبىلدىردى. قازىرگى ۋاقىتتا اباي اۋدانىنىڭ جەرگىلىكتى تۇرعىندارى، سونداي-اق، قىزمەت ماماندارى العاشقى قاجەتتىلىك زاتتارىمەن تولىعىمەن قامتاماسىز ەتىلگەن. ءبىز سەمەيدەگى باس شتابپەن ۇنەمى بايلانىستامىز جانە قوسىمشا قاجەتتى زاتتار ءتىزىمىن الىپ وتىرامىز»، - دەدى «QAMQOR CHARITY» قوعامدىق قورىنىڭ ءتورايىمى باعدات اناربايەۆا.
ءىرى ۆولونتەرلىكك قوزعالىستار قاتارىندا «قازاقستان ەرىكتىلەرىنىڭ ليگاسى» قق، «QAMQOR CHARITY» قق، «Lider.kz» قق، «مەديسينا جاستارى» رقق جانە ت.ب. بار.
الماتىدا گۋمانيتارلىق كومەك جيناۋ پۋنكتى 12 ماۋسىمدا جۇمىس ىستەي باستادى. ۆولونتەرلەر ءبىرىنشى كەزەكتە قاجەت بولاتىن ازىق-تۇلىك پەن زاتتاردى قابىلداپ جاتىر.
«ءبىز كومەكتى كەستەگە سايكەس، تاڭعى 10.00-دەن كەشكى 19.00-گە دەيىن قابىلدايمىز. ءبىزدىڭ شتابتا 20-دان استام ۆولونتەر جۇمىس ىستەيدى. سوڭعى ەكى تاۋلىكتە 300 كەلىدەن استام گۋمانيتارلىق كومەك جينالدى. ولاردىڭ اراسىندا 8500 دانا رەسپيراتورلىق ماسكانى ءبىزدىڭ «Lider.kz» ۆولونتەرلىك ۇيىمى بەردى. سونىمەن بىرگە، دارى-دارمەك الىنىپ، ۇيگە، جاڭا تۋعان سابيلەرگە قاجەت زاتتار، جەكە باس گيگيەناسىنا قاجەت زاتتار دا الىندى. بۇل - ءبىر كۇن ىشىندە جينالعان كومەكتىڭ كولەمى. ءبىز شتاب جۇمىسىن ءالى دە جالعاستىرامىز. اباي وبلىسىندا بولعان قايعىلى جاعداي ءبارىمىزدىڭ قابىرعامىزدى قايىستىردى»، - دەپ ءبولىستى ۆولونتەر ابزال ءارىپوۆ.
اتاپ وتەتىنى، ۆولونتەرلەر قارجىلاي كومەكتى قابىلدامايدى. قالاعاندار ءبىرىنشى كەزەكتە قاجەت بولاتىن ازىق-تۇلىكتى (كونسەرۆىلەر، ماكارون جانە باسقالارى) جيناپ، ءبىر رەت قولداناتىن ىدىس، قۋاتتاۋ قۇرالدارى، جەكە باس گيگيەناسىنا قاجەت زاتتار، سۋ جانە ت.ب. جيناۋ پۋنكتتەرىنە اكەلۋلەرىنە بولادى.
ءقازىر تۇرعىنداردى، كاسىپكەرلەردى وسى جۇمىسقا تارتۋ ءۇشىن اقپاراتتىق جۇمىستاردى جۇرگىزىپ جاتىرمىز. جالپى وسى اپتانىڭ سوڭىنا دەيىن جينالعان كومەكتىڭ العاشقى جۇگىن جىبەرۋدى جوسپارلاپ وتىرمىز. كومەك قاجەتتىلىگىنە قاراي جينالادى. بۇعان دەيىن جينالعان قورلار تاجىريبەسى كورسەتكەندەي، كومەك جيناۋ ءبىر اپتاعا دەيىن جالعاسادى جانە ودان كەيىن قاجەتتىلىگى ازايادى. ودان كەيىن دە كومەك قاجەت بولسا، ءبىز جۇمىستى جالعاستىرامىز»، - دەدى ب.اناربايەۆا.
ۆولونتەرلەردىڭ قاتارىنا قوسىلعىسى كەلەتىندەر نەمەسە گۋمانيتارلىق كومەك جيناۋعا اتسالىسقىسى كەلەتىندەر بايتۇرسىنوۆ كوشەسى، 22، 1-كورپۋس، 1-قابات مەكەنجايى بويىنشا الماتى ۆولونتەرلەرىنىڭ فرونت-كەڭسەسىنە جولىعۋىنا بولادى. نەمەسە +7 747 821 64 78، +7 747 540 01 40، +7 771 625 77 76 سall-ورتالىقتارىنىڭ نومىرلەرىنە حابارلاسا الادى.