الماتىلىق شاحماتشىلار ەرەكشە ناتيجەگە قول جەتكىزدى

الماتىدا 6 جاستان 18 جاسقا دەيىنگى شاحماتشى جاستار اراسىندا كلاسسيكالىق، راپيد جانە بليس شاحمات بويىنشا قازاقستان چەمپيوناتى ءوز مارەسىنە جەتتى. تۋرنيرگە قازاقستاننىڭ 17 ءوڭىرى مەن 3 قالاسىنان 950 جاس شاحماتشى قاتىستى، دەپ حابارلايدى aqshamnews.kz

استانا قالاسىنىڭ ورەندەرى ۇزدىك اتانىپ، 17 التىن مەدال جەڭىپ الدى. ونىڭ ىشىندە كلاسسيكادان – 6، راپيدتەن – 5، بليستەن – 6 التىن. سونىمەن قاتار، الماتى، الماتى وبلىسى، اقتوبە، تۇركىستان جانە پاۆلودار وبلىستارىنىڭ شاحماتشىلارى دا جۇلدەلى ورىنداردان كورىندى.

الماتىلىق شاحماتشىلار ەرەكشە ناتيجەگە قول جەتكىزدى. 6 جاسقا دەيىنگى جاس ساناتىندا ماكار چەرنىشوۆ جانە 12 جاسقا دەيىنگى جاس ساناتىندا دانيس قۋاندىق ۇلى شاحماتتىڭ بارلىق ءۇش ءتۇرى بويىنشا التىن مەدال جەڭىپ، "ءابسوليۋتتى چەمپيون" اتاندى. بۇل جەتىستىككە الماتى وبلىسىنىڭ شاحماتشىلارى جانسايا شولپانبەك پەن ەلناز قالياحمەت تە قول جەتكىزدى.

كلاسسيكالىق شاحماتتان چەمپيون اتانعان جاسوسپىرىمدەر گرۋزيانىڭ باتۋمي قالاسىندا وتەتىن الەم كۋبوگىندا، سونداي-اق جاس ەرەكشەلىكتەرىنە قاراي الەم چەمپيوناتتارىندا قازاقستاننىڭ نامىسىن قورعايدى. ەكىنشى ورىن يەگەرلەرى تايلاندتا وتەتىن ازيا چەمپيوناتىنا قاتىسادى. ال جۇلدەلى ورىندارعا يە بولعان باسقا شاحماتشىلار وقۋشىلار اراسىنداعى الەم جانە ازيا چەمپيوناتتارىنا، سونداي-اق باتىس ازيا چەمپيوناتىنا جولداما الدى.

بۇل چەمپيونات قازاقستاندا شاحماتتىڭ قارقىندى دامىپ كەلە جاتقانىن جانە جاس تالانتتاردىڭ حالىقارالىق ارەنادا لايىقتى ونەر كورسەتۋگە دايىن ەكەنىن كورسەتتى.