الماتىلىق پوليسەيلەر ەسىرتكى قويىپ كەتۋشىلەردى انىقتاۋ جۇمىستارىن كۇشەيتتى.
بۇگىنگى كۇنى جاھاندىق ماسەلەلەردىڭ ءبىرى – سينتەتيكالىق ەسىرتكى. الماتىدا ەسىرتكى قىلمىسىمەن كۇرەسۋشىلەر ەسىرتكى زاتتارىن دايىنداپ، ولاردى جاسىرىن ورىندارعا قويىپ كەتۋ ارقىلى تاراتقان ادامداردى انىقتاۋ بويىنشا جەدەل جانە ارنايى ءىس-شارالار جۇرگىزۋدە، دەپ حابارلايدى Almaty-akshamy.kz Polisia.kz-كە سىلتەمە جاساپ.
«سينتەتيكالىق ەسىرتكىلەردى بايلانىسسىز ادىسپەن، ينتەرنەت ارقىلى، ەلەكتروندى تولەمدەردى پايدالانا وتىرىپ تاراتۋ ءۇردىسى ساقتالۋدا. بيىل قالادا 28 ءىرى “قويىپ كەتۋشى” ۇستالدى. ولاردىڭ اراسىندا جوعارى وقۋ ورىندارىنىڭ ءبىرىنىڭ 19 جاستاعى ستۋدەنتى دە بار، ونى ۇستاۋ كەزىندە ودان “مەف 1،0*10”، “مەف 0،5*15” دەگەن جازۋى بار بۋما تابىلىپ، تاركىلەندى. ىشىندە ۇنتاقتى زاتى بار 25 پوليەتيلەن تۇيىنشەگى بولدى. ءوز كەزەگىندە ۇستالعان ازامات “قويىپ كەتۋشى” بولىپ جۇمىس ىستەيتىنىن ءتۇسىندىردى. تاپسىرمانى ونلاين رەجيمىندە قابىلداعان. “جۇمىس بەرۋشىنىڭ” نۇسقاۋى بويىنشا ول كۇنىنە ورتا ەسەپپەن 20-25 جەرگە ەسىرتكى جاسىرعان. جاس جىگىت جۇمىسىنىڭ اقىسىن ەلەكتروندى تۇردە العان. ءقازىر ايىپتالۋشى قاماۋدا وتىر»، – دەدى الماتى قالالىق پوليسيا دەپارتامەنتى باستىعىنىڭ ورىنباسارى ديدار احانوۆ.
جەدەل ىزدەستىرۋ شارالارىمەن قاتار قوعامدا ناشاقورلىقتىڭ الدىن الۋ جانە ەسىرتكىگە قارسى يممۋنيتەتتى قالىپتاستىرۋ جۇمىستارى بەلسەندى جۇرگىزىلۋدە.
پوليسيا قىزمەتكەرلەرى وسى جىلى ەرىكتىلەرمەن بىرگە ەسىرتكىنىڭ تارالۋى تۋرالى اقپاراتتى قامتيتىن 4 752-دەن استام گراففيتي جازۋىن تاۋىپ، جويعان. سونىمەن قاتار، قازىرگى ۋاقىتتا ەسىرتكى قۇرالدارىن، پسيحوتروپتىق زاتتاردى نەمەسە سول تەكتەستەردى، پرەكۋرسورلاردى زاڭسىز جارنامالاۋ (ق ر قك-نىڭ 299-بابى 1-1-بولىگى) دەرەگى بويىنشا 7 سوتقا دەيىنگى تەرگەۋ امالدارى جۇرگىزىلۋدە.
جىل باسىنان بەرى قالادا ەسىرتكىنىڭ زاڭسىز اينالىمىنا قاتىستى 340 قۇقىقبۇزۋشىلىق انىقتالدى، ونىڭ ىشىندە ولاردى ساتۋدىڭ 77 دەرەگى بار. 218 كەلىگە جۋىق ەسىرتكى زاتتارى تاركىلەنىپ، زاڭسىز اينالىمعا جىبەرىلگەن جوق.