الماتىلىق ورتوپەدتەر اياعى كۇردەلى سىنعان كۋرەردى اياققا تۇرعىزدى

الماتى قالالىق جەدەل شۇعىل كومەك كورسەتۋ اۋرۋحاناسىنىڭ (قجشككا) تراۆماتولوگ-ورتوپەدتەرى 21 جاسار ناۋقاستى اياققا تۇرعىزدى.

جەدەل جاردەم بريگاداسى قاتتى اۋرۋ سەزىمى، تىرەك فۋنكسياسىنىڭ بۇزىلۋى جانە سول اياقتىڭ دەفورماسياسىنا شاعىمدانعان جاس جىگىتتى قجشككا قابىلداۋ بولىمىنە جەتكىزدى. ناۋقاستى تولىق تەكسەرۋدەن كەيىن سول سان سۇيەگىنىڭ ورتاڭعى ۇشتەن ءبىر بولىگىنىڭ سىنىقتارىنىڭ ىعىسۋى ورىن العان جابىق سىنىق دياگنوزى قويىلدى. دارىگەرلەر شۇعىل وتا جاساۋ تۋرالى شەشىم قابىلدادى، دەپ حابارلايدى Almaty-akshamy.kz. 

قۇرامىندا تراۆماتولوگ-ورتوپەدتەر نۇرسۇلتان ەرنازاروۆ، ءمادي جانات ۇلى جانە باعلان جيەنالييەۆ بار حيرۋرگيالىق بريگادا ناۋقاسقا سول جامباس سۇيەگىنىڭ جابىق رەپوزيسياسى، بيوس وتاسىن جاسادى.

بۇعاتتالاتىن ينترامەدۋلليارلىق وستەوسينتەز (بيوس) - سۇيەك جاراقاتىن شاعىن ءينۆازيۆتى حيرۋرگيالىق ەمدەۋ ءادىسى. مۇنداي وتا كەزىندە سىنىق ايماعى اشىلىپ كەسىلمەيدى، بۇل زاقىمدالعان سۇيەكتىڭ قانمەن قامتاماسىز ەتىلۋىن ساقتاۋعا مۇمكىندىك بەرەدى جانە سىنىقتىڭ تەز جازىلۋ مۇمكىندىگىن قامتاماسىز ەتەدى. 

- مۇنداي وتانىڭ باستى ەرەكشەلىگى – وتا تەز جاسالادى، 30-40 مينۋتقا سوزىلادى. وتا جاسالعان ايماق كەسىلمەي، تەك بىرنەشە تەسىك جاسالادى. سوندىقتان جارانىڭ جازىلۋى تەز، ءارى اسقىنۋ مەن ىرىڭدەۋ ءقاۋپى وتە تومەن. ناۋقاس وتادان كەيىن اياققا تەز تۇرادى، تەز ساۋىعادى. سۇيەك جاقسى جينالادى، - دەپ تۇيىندەدى دارىگەر تراۆماتولوگ-ورتوپەد نۇرسۇلتان ەرنازاروۆ.

جارتى ساعاتقا سوزىلعان وتا ءساتتى ءوتتى. وتادان كەيىنگى كەلەسى كۇنى ناۋقاس بالداقمەن جۇرە باستادى. ال جەتىنشى كۇنى تۇرعىلىقتى جەرى بويىنشا امبۋلاتورلىق ەمدەۋگە شىعارىلدى.