20 ماۋسىمنان باستاپ قالا سىرتىنداعى جازعى ساۋىقتىرۋ لاگەرىنە الماتىلىق وقۋشىلاردىڭ العاشقى لەگى اتتاندى، دەپ حابارلايدى almaty-akshamy.kz
الماتى قالاسىنىڭ ءبىلىم باسقارماسى ەرەكشە ءبىلىم بەرۋدى قاجەت ەتەتىن 100 بالانى «بالداۋرەن» بالالار لاگەرىنە 10 كۇنگە ساۋىقتىرۋ دەمالىسىنا جىبەردى. لاگەر قاپشاعاي سۋ قويماسىنىڭ ادەمى سولتۇستىك جاعالاۋىندا ورنالاسقان.
بالالاردىڭ دەمالىسىن قىزىقتى وتكىزۋى، ءتۇرلى ءىس-شارالارعا قاتىسۋى جانە جاڭا دوستار تابۋى ءۇشىن بارلىق جاعداي جاسالعان. پەداگوگيكالىق ءبىلىمى مەن مەديسينالىق قىزمەتكەرلەرى بار ارنايى دايىندالعان كەڭەسشىلەر بالالاردىڭ ءقاۋىپسىز جانە جايلى تۇرۋىن قامتاماسىز ەتۋگە دايىن.
«بيىل قاۋىپسىزدىكتى بارىنشا قامتاماسىز ەتۋ ءۇشىن بالالار لاگەرلەرىندە باقىلاۋ كۇشەيتىلدى. «بالداۋرەن» لاگەرىندە قاتاڭ سانيتارلىق باقىلاۋ، اۋماقتىڭ قاۋىپسىزدىگىن ارتتىرۋ جانە بالالاردى جۇيەلى تۇردە مەديسينالىق تەكسەرۋدەن وتكىزۋ سياقتى قوسىمشا شارالار ەنگىزىلدى»، - دەيدى الماتى قالالىق قوعامدىق كەڭەس مۇشەسى رافاەل گاسانوۆ.
ساراپشىلاردىڭ ايتۋىنشا، بۇل بالالاردىڭ جازعى دەمالىسىن بارىنشا ءقاۋىپسىز جانە ەڭ قولايلى ورتادا وتكىزۋىن قامتاماسىز ەتەدى.
ەستەرىڭىزگە سالا كەتەيىك، الماتىدا بيىل 266 مىڭ ساۋىقتىرۋ جانە جۇمىسپەن قامتۋ سىندى ەكى باعىتتا جازعى دەمالىسپەن قامتىلادى. ونىڭ ىشىندە 3 مىڭنان استام بالا قالا سىرتىنداعى جازعى ساۋىقتىرۋ لاگەرلەرىندە دەمالاتىن بولادى.