"ءجاسوسپىرىم" رەسپۋبليكالىق جەدەل-پروفيلاكتيكالىق ءىس-شاراسى اياسىندا الماتى قالاسى مەدەۋ اۋدانىنداعى مەكتەپ وقۋشىلارى ءۇشىن پوليسيا دەپارتامەنتىنە تانىمدىق ەكسكۋرسيا ۇيىمداستىرىلدى، دەپ حابارلايدى aqshamnews.kz.
جاس الماتىلىقتار پوليسيا مۇراجايىن ارالاپ، ءىىو-نىڭ باي تاريحىمەن جانە ونداعان جىل بويى قوعامدىق ءتارتىپ پەن زاڭدىلىقتى قامتاماسىز ەتۋگە قوسقان ۇلەسىمەن تانىستى. بالالار ىشكى ىستەر ورگاندارىنىڭ دامۋىنا، قىزمەتكەرلەردىڭ ەرلىكتەرىنە، سونداي-اق زاماناۋي جەتىستىكتەرگە ارنالعان ەكسپوناتتاردى قىزىعۋشىلىقپەن تاماشالادى. ەكسكۋرسيانىڭ ەڭ ەستە قالاتىن ساتتەرىنىڭ ءبىرى – جەدەل باسقارۋ ورتالىعىنا بارعان ءسات بولدى. مۇندا "102" جەلىسى ارقىلى ازاماتتاردان تۇسكەن سيگنالدار تاۋلىك بويى قابىلدانىپ، وڭدەلەدى، پاترۋلدىك جانە توتەنشە جاعدايلار قىزمەتىنىڭ جۇمىسى ۇيلەستىرىلىپ، بەينەباقىلاۋ ارقىلى قالاداعى جاعداي باقىلانادى.
- مۇنداي ءىس-شارالار وسكەلەڭ ۇرپاقتىڭ بويىندا ازاماتتىق جاۋاپكەرشىلىك سەزىمىن، زاڭعا دەگەن قۇرمەت پەن پوليسياعا دەگەن سەنىمدى قالىپتاستىرۋعا باعىتتالعان. ءبىز بالالاردىڭ ءوز قۇقىقتارىن ءبىلىپ قانا قويماي، زاڭدى ساقتاۋدىڭ ماڭىزدىلىعىن تۇسىندىرۋگە تىرىسامىز. پوليسيانى ىشتەي ءتانىپ-بىلۋ مەكتەپ وقۋشىلارىنىڭ بويىندا دۇرىس باعىت-باعدار قالىپتاستىرۋعا جانە ولاردىڭ قۇقىقتىق ساناسىن نىعايتۋعا سەپتىگىن تيگىزەدى، - دەدى مەدەۋ اۋداندىق پوليسيا باسقارماسىنىڭ باستىعى ءىلياس ومىرسەرىكوۆ.