بيىل الماتىلىقتاردىڭ دەنساۋلىعىن ساقتاۋعا 334،2 ملرد تەڭگە ءبولىندى. ونىڭ 158،5 ملرد تەڭگەسى مىندەتتى الەۋمەتتىك مەديسينالىق ساقتاندىرۋ پاكەتىنە، قالعان 175،7 ملرد تەڭگەسى كەپىلدەندىرىلگەن تەگىن كومەك پاكەتىنە ءتيىسىلى. بۇل تۋرالى مەديسينالىق ساقتاندىرۋ قورىنىڭ الماتى قالالىق فيليالى حابارلادى.
حابارلاماعا سۇيەنسەك، بيىل الماتى قالاسى بويىنشا حالىققا مەدساقتاندىرۋ جانە كەپىلدەندىرىلگەن تەگىن كومەك شەڭبەرىندە 212 مەديسينا ۇيىمى كومەك كورسەتپەك. قورمەن كەلىسىمشارت بەكىتكەن كلينيكالاردىڭ 132ء-سى — جەكە مەنشىك. بيىل قورمەن جۇمىس ىستەيتىن الماتىلىق كلينيكالار قاتارى ەمحانا جانە ستوماتولوگيا قىزمەتتەرىن كورسەتەتىن 6 جاڭا كلينيكامەن تولىعىپ وتىر.
مەديسينالىق مەكەمەلەر تىزىمىمەن قوردىڭ fms.kz سايتى ارقىلى تانىسۋعا بولادى.
ساقتاندىرۋ جۇيەسى تولىققاندى ەنگىزىلگەن 5 جىل ىشىندە مەملەكەتتىك ۇيىمدارمەن قاتار جەكە كلينيكالار كورسەتەتىن قىزمەت سپەكترى دە ايتارلىقتاي ارتتى. بۇگىندە قورمەن جۇمىس ىستەيتىن بيزنەس نىساندارى جالپى پراكتيكا دارىگەرىلەرىمەن، سالالىق ماماندارمەن جابدىقتالعان، گەمودياليز، ەكستراكورپورالدى ۇرىقتاندىرۋ، مەديسينالىق وڭالتۋ، پوزيتروندى-ەميسسيوندىق توموگرافيا، ماگنيتتى-رەزونانستىق جانە كومپيۋتەرلىك توموگرافيا سىندى تاعى دا باسقا قىزمەتتەر كورسەتەدى.