وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسىندا الماتى كاسىپكەرلىك جانە ينۆەستيسيالار باسقارماسىنىڭ باسشىسى ەركەبۇلان ورازالين ءوز ءىسىن جاڭادان باستاعان كاسىپكەرلەردى قولداۋ شارالارى تۋرالى ايتتى، دەپ حابارلايدى Almaty-akshamy.kz.
الماتىدا كاسىپكەرلەردى قولداۋعا ارنالعان بىرنەشە باعدارلاما بار. "بيزنەستىڭ جول كارتاسى – 2025" باعدارلاماسىنىڭ ءۇشىنشى باعىتى بويىنشا ءىسىن جاڭا باستاعان كاسىپكەرلەرگە قايتارىمسىز نەگىزدە 5 ميلليون تەڭگەگە دەيىنگى سومادا يننوۆاسيالىق گرانتتار بەرىلەدى.
"بۇگىندە 510 ملن تەڭگەنىڭ 161 جوباسىنا قولداۋ كورسەتىلدى، ونىڭ ىشىندە 326 ملن تەڭگەنىڭ 106 جوباسىنا حالىقتىڭ الەۋمەتتىك وسال توپتارى مەن كوپ بالالى انالار قاتىسادى"، – دەدى ە. ورازالين.
Qolday كاسىپكەرلىك ورتالىعى بيزنەس-جوسپارلاردى دايىنداۋ ءۇشىن ءىسىن جاڭا باستاعان كاسىپكەرلەرگە جان-جاقتى قولداۋ كورسەتەدى.
سونداي-اق "Almaty Business – 2021" باعدارلاماسى بويىنشا تەگىن ءبىلىم بەرۋ مەن اكسەلەراسيا جوباسى ىسكە قوسىلدى. ە. ءورازاليننىڭ ايتۋىنشا، اكسەلەراسيا باعدارلاماسى – بۇل شوب ءۇشىن ءوز بيزنەسىن ساراپشىلاردىڭ كوزىمەن قاراۋعا، ونداعى ءالسىز جاقتاردى تابۋعا، دامۋ جوسپارىن قۇرۋعا جانە ساتۋ مەن تابىستى ارتتىرۋعا مۇمكىندىك بەرەدى.
"ساراپشىلارمەن 8 اپتا ىشىندە جۇمىس ىستەگەن كاسىپكەر تالىمگەرلىك پەن ساراپتامالىق قولداۋ ارقىلى ءوز كاسىبىنىڭ ءوسۋ نۇكتەلەرى مەن تيىمدىلىگىن انىقتايدى. 7 سالالىق باعىتتا، سونىڭ ىشىندە قىزمەت كورسەتۋ جانە ونەركاسىپتىڭ جەكەلەگەن تۇرلەرى سالاسىندا جۇمىس ىستەيتىن 1 مىڭنان استام كاسىپكەردى قامتۋ كوزدەلگەن"، – دەدى كاسىپكەرلىك جانە ينۆەستيسيالار باسقارماسىنىڭ باسشىسى.
ايتا كەتەرلىگى، قازىرگى ۋاقىتتا قالا ەكونوميكاسىنىڭ 45%-دان استامىن جەكە كاسىپكەرلىك قالىپتاستىرادى. 10 قالا تۇرعىنىنىڭ 6-ۋى شاعىن جانە ورتا كاسىپپەن اينالىسادى. قازاقستانداعى ءاربىر التىنشى كاسىپورىن الماتىدا اشىلعان.