زامانىنا قاراي سپورتتىڭ كەي ءتۇرى دە سانگە اينالىپ، دامىپ كەلەدى. الماتىلىق جاستار اراسىندا ۋربانيستىك سپورتتىڭ 10 ءتۇرى تانىمال.
الماتى ەلىمىزدە مادەنيەت سالاسىندا عانا ەمەس، سپورت سالاسىندا دا باستى ترەندسەتتەرگە اينالدى. وڭتۇستىك استانادا جىل سايىن قازاقستان ءۇشىن جاڭا سپورت تۇرلەرى پايدا بولىپ، قارقىندى دامىپ كەلە جاتىر. ولاردىڭ كوبى قالانىڭ تۇرمىسىنا ابدەن ەنىپ الدى، دەپ حابارلايدى Almaty-akshamy.kz.
نازارلارىڭىزعا Olympic.kz سايتى تىزىمدەگەن تانىمال سپورت تۇرلەرىن ۇسىنامىز.
ۋربانيستىك جانە ەكسترەمالدى سپورت تۇرلەرىن جاقسى كورەتىن جاندار ءۇشىن بىر-بىرىمەن اقشالاي سىيلىقتار ءۇشىن سايىسقا مۇمكىندىك بار. سونداي الاڭداردىڭ ءبىرى — Almaty Urban Fest. بيىل ءىس-شارانىڭ باعدارلاماسىنا 10 سپورت ءتۇرى ەنىپ، 1000-نان استام قاتىسۋشىنىڭ باسىن قوستى.
باسكەتبول 3ح3 – حالىقارالىق وليمپيادا كوميتەتىنىڭ جۇرگىزگەن زەرتتەۋى بويىنشا قالالارداعى ەڭ تانىمال سپورت ءتۇرى. 2017 جىلى وليمپيادا باعدارلاماسىنا ەنگىزىلىپ، العاش رەت توكيو وليمپياداسىندا تانىستىرىلدى. كلاسسيكالىق باسكەتبولمەن سالىستىرعاندا سپورتتىڭ بۇل تۇرىندە ءار كوماندادا 3 ادام وينايدى. ويىن 10 مينۋتقا نەمەسە تاراپتاردىڭ ءبىرى 21 ۇپاي جيناماعانعا دەيىن سوزىلادى.
ستريت ۆورك-اۋت – 2000 جىلداردىڭ باسىندا اقش-تىڭ كەدەي اۋداندارىندا تارالعان بۇل باعىتتى ءجاي كوشە گيمناستيكاسى دەپ قاراماي، سپورت سۋبمادەنيەتى دەۋگە بولادى. ۆوركاۋتتىڭ دامۋىنا ينتەرنەت ۇلكەن اسەر ەتتى. كوشە جاتتىعۋلارىنىڭ ۆيدەوسى جاستار اراسىندا ۇلكەن قىزىعۋشىلىقتى تۋدىرىپ، كەيىن قازاقستانعا دا جەتتى. بۇگىندە ەلىمىزدىڭ ءار قالاسىندا ارنايى ۆورك-اۋت جاتتىعۋلارىنا ارنالعان الاڭداردى كەزدەستىرۋگە بولادى.
ارمرەستلينگ – بارشا الەمدە كەڭ تانىلعان سپورت تۇرلەرىنىڭ ءبىرى. وليمپيادا باعدارلاماسىنا ەنبەگەن. الايدا قاراپايىمدىلىعىنا قاراماستان قاتىسۋشىلار مەن كورەرمەندەردىڭ اراسىندا ۇلكەن قىزىعۋشىلىقتى وياتادى.
كوشە بيلەرى – بي ستۋديالارىنان بولەك قالىپتاسقان بي ءستيلى. ءبيدىڭ باسقا باعىتتارىنىڭ كوپتەگەن ەلەمەنتتەرىن بىرىكتىرەدى جانە كوپ جاعدايدا يمپروۆيزاسياعا جۇگىنەدى. الماتىلىقتاردىڭ اراسىندا سپورتتىڭ بۇل ءتۇرى وتە تانىمال. اپتا سايىن كوشە بيشىلەرى ءوز شەبەرلىكتەرىن كورسەتۋ ءۇشىن ءارتۇرلى الاڭداردا جينالادى. سوڭعى جىلدارى Tik-Tok قوسىمشاسىنىڭ ارقاسىندا بۇل باعىت قايتا گۇلدەنە باستادى.
اگرەسسيۆتى روليكتەر، كيك-سكۋتەر، سكەيتبوردينگ – روليك، سكۋتەر جانە سكەيتبوردتى ەكسترەمالدى سىرعاناۋ دەپ ايتۋعا بولادى. سىرعاناۋدىڭ نەگىزگى ەلەمەنتتەرى – سەكىرۋ جانە تايعاناۋ. ولارعا اۋەدە اكروباتيكالىق تريۋكتەردى قوسۋعا بولادى. وڭتۇستىك استانانىڭ جىلى كليماتى مەن جەر بەدەرىنىڭ (تومەن تۇسەتىن جانە جوعارى كوتەرىلەتىن) ىڭعايلى بولۋىنا سايكەس الماتىلىق جاستار اراسىندا كەڭ تارالعان. قازاقستاننىڭ وزگە قالالارىندا دا سپورتتىڭ بۇل تۇرىنە قىزىعۋشىلىق ارتىپ كەلەدى. سول سەبەپتى جاڭا سكەيت-ساياباقتارى مەن سكەيت-جولدارى سالىنا باستادى.
BMX – ۆەلوسپورتتىڭ ەڭ تارتىمدى ءارى ەكسترەمالدى ءتۇرى. ارنايى ۆەلوسيپەدتە سەكىرىپ، ءارتۇرلى تريۋكتەر جاساۋعا بولادى. سپورتتىڭ بۇل ءتۇرى دە قازاقستاندا تۇراقتى دامىپ كەلەدى. ەلىمىزدىڭ تۇكپىر-تۇكپىرىندە BMX جاناشىرلارى بار ەكەنىن ايتا كەتكەن ءجون.
پاركۋر – سەكىرۋ ەلەمەنتتەرىن قولدانا وتىرىپ، كەدەرگىلەردەن جىلدامدىقپەن ءوتۋ. ستريت ۆورك-اۋت سياقتى سپورت تۇرىنە قاراعاندا سۋبمادەنيەتكە جاقىنداۋ. پاركۋردىڭ ماقساتى – ءارتۇرلى كەدەرگىلەردەن ءوتىپ، جىلدام اۋىسۋ. العاش رەت Almaty Urban Fest باعدارلاماسىنا ەنگىزىلدى.
كيبەرسپورت (Dota 2) – سپورتتىڭ بۇل ءتۇرىن ۋربانيستىك دەپ ايتۋ قيىن. الايدا بۇقارالىق جاعىنان جاستار اراسىندا وتە تانىمال بولعاندىقتان Almaty Urban Fest باعدارلاماسىنا قوسىلدى. كوپشىلىك وينايتىن Dota 2 كومپيۋتەر ويىنى 2013 جىلى شىققانىنا قاراماستان، اراعا 10 جىل سالىپ ءالى دە ماڭىزىن جوعالتپاي، قىزىعۋشىلىق ازايمادى. ءبىزدىڭ ەلىمىزدە 2018 جىلدان باستاپ رەسمي سپورت تۇرىنە اينالدى. ال وتاندىق 5 كيبەرسپورتشى ەۋروپالىق ايماقتىڭ ۇزدىك وندىعىنا ەنەدى.
ۋربانيستىك سپورت سايىستارى ەرەكشە جاعدايدى جانە قوماقتى قاراجاتتى تالاپ ەتپەيدى. سونىڭ ارقاسىندا جىلدام بۇقارالىق سپورت تۇرىنە اينالىپ بارا جاتىر. ازاماتتار بوس ۋاقىتىن تەگىن ءارى ساپالى وتكىزە الادى. Almaty Urban Fest سىندى ءىس-شارالار قازاقستاندا قالالىق سپورت تۇرلەرىن كەڭىنەن ناسيحاتتايدى. سونىمەن قاتار جاستاردى سالاۋاتتى ءومىر سالتىن ساقتاۋعا شاقىرادى.
ايتا كەتەيىك، گراند-فينال سايىستارى 17 قىركۇيەكتە ساعات 10:00-دە «الماتى ارەنا» سپورت كەشەنىندە باستالادى. فينال تارتىستارى اياقتالعان سوڭ 18:30-دە جەڭىمپازدار مەن جۇلدەگەرلەردە ماراپاتتاۋ ءراسىمى وتەدى. كورەرمەندەر مەن قاتىسۋشىلاردى 20:00-دە مەرەكەلىك باعدارلاما كۇتەدى.
