الماتىدا جاسوسپىرىمدەرگە ارنالعان ۋربانيستيكا كلۋبى اشىلدى.
جوبا فاكۋلتاتيۆتىك نەگىزدە جۇمىس ىستەيدى. جاسوسپىرىمدەر جەتى اي بويى تاجىريبەلى مامانداردان ءدارىس تىڭداپ، سەمينارلارعا قاتىسادى، سونداي-اق وزدەرى زەرتتەۋ جۇرگىزەدى، دەپ حابارلايدى Almaty-akshamy.kz 24.kz-كە سىلتەمە جاساپ.
ءجانيا مەن جىبەك ءۇشىن ۋربانيستيكا كلۋبى قالاعا پايدالى يدەيالاردى جۇزەگە اسىرۋعا مۇمكىندىك بەرەتىن ورىنعا اينالدى. ولار الماتىنىڭ ەسكەرتكىشتەرى، ينستاللياسيالارى مەن قابىرعا سۋرەتتەرى كورسەتىلگەن ونلاين كارتا جاسادى. مادەنيەت نىساندارىن باسساڭىز بولدى، كارتا ولاردىڭ تاريحى تۋرالى مالىمەت بەرەدى. قىزدار ءۇشىن بۇل ءبىرىنشى تاجىريبە، سوندىقتان ولارعا كاسىبي ماماندار كومەكتەستى. كارتانى ازىرلەۋگە ءبىر اپتا ۋاقىت كەتكەن.
«ءبىزدىڭ نەگىزگى ويىمىز - ادامدارعا كوشە ونەرى تۋرالى، ءوز ايماعىندا قانداي ارت-جوبالار، ينستاللياسيالار بار ەكەنى تۋرالى جەتكىزۋ. مىسالى، قابىرعا سۋرەتتەرى، ولاردىڭ تاريحى قالا تۇرعىندارى مەن قوناقتارى ءۇشىن قىزىق دەپ ويلايمىز»، - دەيدى URBANITARIUM كلۋبىنىڭ مۇشەسى جىبەك بايزۋلينا.
ال داۋلەت ەسىمدى كلۋب مۇشەسىن قالاداعى كولىك قوزعالىسى قاتتى مازالايدى. بۇل - مەگاپوليستىڭ نەگىزگى ەكولوگيالىق پروبلەمالارىنىڭ ءبىرى، - دەيدى جاس ۋربانيست. الداعى ۋاقىتتا ول كولىك كەپتەلىسىن بارىنشا ازايتۋدىڭ وڭتايلى شەشىمدەرىن تابۋدى جوسپارلاپ وتىر. ايتۋىنشا، جاڭا جوبا ۋاقىتتى ۇنەمدەپ، قالا ەكونوميكاسىن جاقسارتۋعا سەپتىگىن تيگىزەدى. ماقساتىنا جەتۋ ءۇشىن تالىمگەرلەرمەن بىرلەسىپ، كارتا قۇراستىرۋدى قولعا الدى.
«ءبىز اۋدانىمىزدىڭ 3D مودەلىن جاسادىق، بۇل بەلگىلى ءبىر اۋماقتار. ياعني مودەلدە ساۋدا مەن بيزنەستى، اۆتوكولىك جولدارىن الىپ تاستاۋعا بولاتىن جەرلەر كورسەتىلدى، ورنىنا جاياۋ جۇرگىنشىلەر اللەياسىن جاساۋعا بولادى»، - دەيدى URBANITARIUM كلۋبىنىڭ مۇشەسى داۋلەت ورمان.
Urbanitarium كلۋبىنداعى جاس ۋربانيستەردىڭ قىزىقتى يدەيالارى كوپ. ولاردىڭ بارلىعى كرەاتيۆتى جانە قالالىق ورتانى جاقسارتۋعا باعىتتالعان. بۇگىندە كلۋبتا ەلۋدەن استام مەكتەپ وقۋشىسى بار. ءوز قالاسىن سۇيەتىن جانە ونى جاقسارتۋعا نيەتتى كەز كەلگەن وقۋشى كلۋبقا مۇشە بولا الادى.
«جاسوسپىرىمدەر مەن بالالار دا قالا تۇرعىنى بولىپ ەسەپتەلەدى. سوندىقتان ولاردىڭ پىكىرىنە قۇلاق اسقان ءجون. سونىمەن قاتار ولاردىڭ قازىردەن باستاپ يگى ىستەرگە ارالاسىپ، قۇندىلىقتاردى بويلارىنا سىڭىرگەندەرى دۇرىس»، - دەيدى URBAN FORUM KAZAKHSTAN قوعامدىق قورىنىڭ تەڭ قۇرىلتايشىسى اسەل ەسجانوۆا.
ۇيىرمەدەگى ساباقتار اپتاسىنا ءبىر رەت قانا وتەدى. ءبىراق سوعان قاراماستان قاتىسۋشىلار ءقازىردىڭ وزىندە ماڭىزدى زەرتتەۋلەرمەن اينالىسۋدا. جاسوسپىرىمدەر وزەندەردى زەرتتەپ، سۋدىڭ لاستانۋ دەڭگەيىن ولشەۋدى ۇيرەنۋدە.