بىلىمدىلەر سايىسى ونلاين فورماتتا ۇيىمداستىرىلعان.
ءۇشىنشى رەت قاتارىنان حالىقارالىق جاۋتىكوۆ وليمپياداسىنىڭ التىن مەدالىن الماتىداعى فيزيكا-ماتەماتيكا باعىتىنداعى زياتكەرلىك مەكتەپتىڭ وقۋشىسى تاير ساتۋبالدين جەڭىپ الىپ، ماتەماتيكتەر اراسىندا ۇزدىك اتاندى، دەپ حابارلايدى Almaty-akshamy.kz قازاقپاراتقا سىلتەمە جاساپ.
كوپتەگەن وليمپيادالاردىڭ جەڭىمپازى مەن جۇلدەگەرى اتانىپ جۇرگەن تاير 5 جاسىنان ەسەپ شىعارا بىلگەن. باحىت ارحيپ قىزى ەسىمدى كۇتۋشىسى كىشكەنتاي تايردىڭ ماتەماتيكاعا دەگەن سۇيىسپەنشىلىگىن وياتقان. ال مەكتەپ تابالدىرىعىن اتتاعان سوڭ، ماتەماتيكا ەڭ قىزىقتى پاندەرىنىڭ بىرىنە اينالعان.
دارىندى بالا 7-سىنىپتان باستاپ حالىقارالىق جارىستاردا ب ا ق سىناعان. بۇگىندە قورجىنىندا 20-عا جۋىق جەڭىسى بار. بىلتىر تايرعا استانا IT ۋنيۆەرسيتەتى تەگىن وقۋعا گرانت ۇسىنسا، بۇگىندە Hong Kong University of Science and Technology جوعارعى وقۋ ورنىندا ءبىلىم الۋعا مۇمكىندىگى بار. جالپى، ءوزى اقش-تاعى Massachusetts Institute of Technology ۋنيۆەرسيتەتىندە وقۋدى كوزدەپ وتىر. ونىڭ ايتۋىنشا، سول وقۋ ورنىندا ءبىلىم الۋىنا بارىن سالماق.
«ءسوزدىڭ شىنى كەرەك، مەن حالىقارالىق جارىسقا دايىندالماي بارىپ، التىن مەدال يەگەرى اتاندىم. ماعان I كەزەڭ II كەزەڭگە قاراعاندا قيىنداۋ سوقتى. ماسەلەن، ءبىرىنشى تۋرعا 4،5 ساعات ۋاقىتىم كەتسە، ەكىنشى تۋرعا 3 ساعات جۇمسادىم. ەندى الداعى ءومىرىمدى جوعارى ماتەماتيكامەن بايلانىستىرعىم كەلەدى. جوسپارلار كوپ»، - دەيدى تاير ساتۋبالدين.
حالىقارالىق جاۋتىكوۆ وليمپياداسى - ينفورماتيكا، فيزيكا جانە ماتەماتيكا پاندەرى بويىنشا 10-12 سىنىپ وقۋشىلارىنا ارنالعان جىل سايىنعى جارىس. بيىل تارتىستى دوداعا الەمنىڭ 21 ەلىنەن 1178 وقۋشى قاتىسقان. جالپى، وليمپيادا قازاقستاندا 2005 جىلدان بەرى وتكىزىلىپ كەلەدى.
ونلاين فورماتتا ەكىنشى رەت ۇيىمداستىرىلىپ وتىر.