قىمبات وپەراسيا مىندەتتى الەۋمەتتىك مەديسينالىق ساقتاندىرۋ قاراجاتى ەسەبىنەن جاسالدى.
قالقامانداعى №7 قالالىق كلينيكالىق اۋرۋحانا دارىگەرلەرى باۋىرىنا ۇلكەن كيستا شىققان ايەلگە وتا جاسادى، دەپ حابارلايدى Almaty-akshamy.kz اۋرۋحانانىڭ باسپا ءسوز قىزمەتىنە سىلتەمە جاساپ.
الماتى وبلىسىنىڭ قاراساي اۋدانىندا تۇراتىن ايەل وسكىندى الىپ تاستاۋ ءۇشىن الماتىداعى №7 قالالىق كلينيكالىق اۋرۋحانا دارىگەرلەرىنە جۇگىنگەن. ايتۋىنشا، دياگنوز قويىلعالى بەرى ءبىر جىل وتكەن. وسى ۋاقىت ىشىندە كيستا بىرنەشە ەسەگە ۇلعايىپتى.
«سوڭعى جىلدارى وڭ جاق قابىرعامنىڭ تومەنگى جاعى ۇنەمى اۋىرىپ مازامدى الاتىن. دارىگەرلەر تەكسەرە كەلە، وتا جاساۋ قاجەتتىگىن ايتتى. وپەراسيانى پورتالعا تۇرىپ، ءمامس ارقىلى قالادا جاساتۋعا بولاتىنىن دا سولاردان ءبىلدىم»، - دەيدى پاسيەنت.
ەستەرىڭىزگە سالا كەتسەك، مەديسينالىق قىزمەتتەرگە، سونىڭ ىشىندە ءمامس پاكەتىنە كىرەتىن وپەراسيالارعا جولدامانى جەرگىلىكتى ەمحانا دارىگەرلەرى بەرەدى. پاسيەنت وسى تارتىپپەن ءتيىستى اناليزدەردى تاپسىرىپ، الماتىداعى №7 اۋرۋحاناعا جولداما الىپتى.
«باۋىرداعى وسكىنگە لاپاروسكوپيالىق فەنەستراسيا جاسالدى. بۇل وپەراسيا كيستانى كىشكەنە ءتىلىپ، ىشىندەگى سۇيىقتىقتى تولىعىمەن الىپ تاستاۋعا مۇمكىندىك بەرەدى. جالپى، لاپاروسكوپيالىق تەحنولوگيالار ەمدەۋ پروسەسىن تەزدەتىپ، پاسيەنتتىڭ وتادان كەيىن تەز قالپىنا كەلۋىنە مۇمكىندىك بەرەدى»، - دەيدى وتا جاساۋشى مامان، №1 حيرۋرگيا ءبولىمىنىڭ مەڭگەرۋشىسى نۇرلان ماۋلەنوۆ.
جەتىنشى اۋرۋحانانىڭ شەتەلدىك كلينيكالاردا تاجىريبە جيناقتاعان تالانتتى حيرۋرگتتەرى مەن انەستيزيولوگتارىنىڭ شەبەرلىگىنىڭ ارقاسىندا كۇردەلى وتا ءساتتى ءوتتى. ءقازىر پاسيەنت اۋرۋحانادان شىعىپ، امبۋلاتورلىق باقىلاۋعا الىندى.
مەديسينالىق ساقتاندىرۋ قورىنىڭ مالىمەتىنشە، ساقتاندىرىلعان ازاماتتار، سونىڭ ىشىندە وزگە ايماقتاردىڭ تۇرعىندارى دا قالالىق ستاسيونارلاردا جاتىپ ەمدەلە الادى. ول ءۇشىن ءوز ەمحاناسى ارقىلى «اۋرۋحاناعا جاتقىزۋ بيۋروسىنا» تىركەلىپ، جولداما الۋ قاجەت.