الماتىدا ءوز ماماندىعىنا ادال قىزمەت ەتىپ، ەڭبەگىمەن كوزگە تۇسكەن قىزمەتكەرلەر «ەڭبەك ادامى – 2024» ماراپاتىمەن ماراپاتتالدى. بۇل ءىس-شارانى الماتى قالاسىنىڭ قوعامدىق دامۋ باسقارماسى ۇيىمداستىردى.
15 الماتىلىق ازامات مەملەكەت پەن مەگاپوليستىڭ دامۋىنا قوسقان ۇلەسى ءۇشىن «ەڭبەك ادامى» سىيلىعىنا يە بولدى. ولاردىڭ اراسىندا 30 جىلعا جۋىق جۋرناليستيكادا، ونىڭ ىشىندە 20 جىلدان استام ۋاقىت «الماتى اقشامى» گازەتىندە ەڭبەك ەتىپ جۇرگەن ارىپتەسىمىز رايا ەسكەندىر دە بار.
ءىس-شاراعا قاتىسقان الماتى قالاسى قوعامدىق دامۋ باسقارماسىنىڭ باسشىسى ايدار ەسەنبەكوۆ ماراپات يەلەرىنە ءوز لەبىزىن ءبىلدىردى.
– قىركۇيەك ايىنىڭ سوڭعى جەكسەنبىسى – ەلىمىزدە ەڭبەك كۇنى رەتىندە اتاپ وتىلەدى. وسىعان وراي، قالامىزدىڭ دامۋىنا ەلەۋلى ۇلەس قوسىپ جۇرگەن ەڭبەكقور ازاماتتاردى ماراپاتتاۋدى ءجون كوردىك. ەلىمىز سىزدەر سياقتى ءوز ىسىنە ادال، ەڭبەكسۇيگىش ادامداردىڭ ارقاسىندا العا باسىپ كەلەدى. مەملەكەت باسشىسى دا بۇل ماسەلەگە ءوز جولداۋىندا ەرەكشە نازار اۋداردى جانە كەلەسى جىلدى جۇمىسشى ماماندىقتار جىلى دەپ جاريالادى. سوندىقتان ەڭبەگىمەن تانىلعان ازاماتتاردى ءاردايىم قۇرمەتتەۋىمىز قاجەت، – دەدى ايدار ەسەنبەكوۆ.